10 августышто Йошкар-Оласе изобразительный искусство тоштерыште Сергей Алдушкинын «Россий – Сербий» выставкыже почылтын. Ты кечын тудлан Марий Элын тӱвыра, печать да калык-влакын пашашт шотышто министрже Михаил Васютин «За заслуги перед Марий Эл» орденын медальжым кучыктен.
Саламлыме годым Михаил Зиновьевич палемден: «Сергей Сергеевич тыныслыкын шкешотан посоложо улеш. Марий калыкым тудын пашажлан кӧра тора кундемыштат палат. Мутлан, Сербийыште, Кувейтыште. Чыла вере тудо Российын лӱмжым чапландара».
Выставкым почмаште юбилярым саламлаш (август тӱҥалтыште С.Алдушкин 50 ияш лӱмгечыжым палемден – авт.) Белград ола гыч сӱретче Миряна Стоянович лӱмын толын.
— Ынде Сербият Сергей Сергеевич дене лишкырак палыме лийын. Российын шуко художникше кокла гыч тудо мыланна эн лишыл. Икымше гана пашажым 2006 ийыште акленна. Верысе калык выставкыжым пеш шокшын вашлийын. Сӱретлаж гоч Марий Элын пӱртӱс моторлыкшым ужына. Тыгак радыналаштыже чонжымат, кумылжымат шижаш лиеш. Сергей Алдушкин мутланымаштат пеш проста, тыматле, — мане М.Стоянович.
— Самырык годым чыла чыташ логалын: сайжымат, осалжымат. Таум каласем туныктышем-влаклан. Поснак Зосим Федорович Лаврентьевлан, Иван Михайлович Ямбердовлан, — палемден С.Алдушкин.
Варажым сӱретчым йолташыже-шамыч саламлышт. Ятыр шокшо мутым Российын сулло художникше Иван Ямбердов ойлыш. А мучаште Татьяна Ямбердова скрипка дене сылне марий семым шокталтыш.
Сергей Алдушкин творчествыштыже Российысе реалистический искусствылан, руш классик-живописец-влаклан эҥерта. 1989 ий гыч Сергей Сергеевичын радынажым Российысе, Марий Элысе да вес элласе ончерлаште ужаш лиеш. 2005 ийыште тудым Россий художник-влакын ушемышкышт пуртеныт. С.Алдушкин шочмо мландын сӧраллыкшым, кызытсе калыкын илышыжым сӱретлаш йӧрата, шуко жапым руш пейзажлан ойыра. Акварель дене сӱретлыме радыналажым «Марий кундем», «Кугу Юл» выставкылашке чӱчкыдын луктеш. 2002 ийыште «Марий альбом» циклже дене тудо Олык Ипай лӱмеш Кугыжаныш молодежный премий дене палемдалтын. 2013 ийыште «Шочмо кундем: пӱртӱс ден калык» серийже дене А.В.Григорьев лӱмеш Марий Элын Кугыжаныш премийжын лауретше лийын. Сӱретчын пашаже-влак Коломна олан тоштерыштыже, Плесын историко-художественный музей-заповедникыштыже да элнан ятыр лӱмлӧ еҥже-влак дене аралалтыт. Режиссёр Никита Михалковат С.Алдушкинын творчествыжым кӱкшын акла.
М.СКОБЕЛЕВ.
Авторын фотожо.
Снимкыште: М.Васютин С.Алдушкиным Марий Элын кӱкшӧ наградыжым кучыктымо дене саламла.
