Эртыше каныш кечылаште Медведево районысо Юбилейный посёлкышто ече дене 29-ше марафон эртен. Тушко тӱрлӧ район гыч кумылан ечызе-влак чумыргеныт. Тыгай таҥасымашым эртарымаш тыште йӱлаш пурен.
– Тений поснак шуко участник лийын, кумылан 325еҥ чумырген. Пытартыш ийлаште мемнан деке тӱрлӧ кундемла гыч толыт. Республик кӱкшытан огыл, регион-влак коклаште таҥасымаш манашат келшен толеш ала-мо… Киров, Нижегородский областьла, Чуваш Республик гыч лийыныт, – манеш таҥасымашын организаторжо-влак кокла гыч иктыже С.Кугергин.
– Ийготым да тӱшкам шотыш налын, чылаже 78 пӧлекым кучыктымо. Абсолютный чемпион – Кужэҥер район гыч Владимир Кутузов. Тудлан кубок дене пӧлекым кучыктымо. Кокымшо – Константин Павлов. Рвезе Кужэҥер район гыч, Москошто тунемеш. Икымше тренерже Вячеслав Степанович Еменгулов. Кумшо верым Юбилейный посёлко гыч Сергей Морозов налын, – умылтара таҥасымашлан вуйын шогышо М.Николаев. – Пӧръеҥ-шамыч 30 километр кутышым эртеныт гын, ӱдыр-влак – коло километрым. ™дыр-влак коклаште икымше верыш Юбилейный гыч Кристина Петрова лектын. Кокымшо ден кумшо верым Медведево район гыч ака-шӱжар Ирина ден Марина Офонькинамыт налыныт. Толшо уна-влакым шокшо кечывал кочкыш дене сийленна.
Игече изиш луманрак лийын, но спортсмен-влаклан тиде чаракым ыштен огыл. Ечыгорным ончылгочак сайын ыштен ямдыленыт.
Сандене толшо-влак сай кумыл дене таҥасеныт.
Мут толмашеш: 30 мартыште Кужэҥер районысо Коҥганур кыдалаш школ воктене Спорт мастер-влак лӱмеш ече дене таҥасымаш лиеш. Тушто чыла кумылан ечызе-влак вийым терген кертыт.
Е.Эшкинина.
