Волжский район Пӧтъял кыдалаш школышто тунемше-влак моло общеобразовательный учреждений семынак физкультур ден спортлан шӱман улыт. Район, республик кӱкшытыштє тӱрлӧ таҥасымаште вийыштым тергат, сеҥыше ден призёр радамыш логалыт. Таче ты кундемыште сай результатым ончыктышо ечызе Максим Степанов дене палдарена.
Максим 10-шо классыште тунемеш, спортын чыла видше дене, манаш лиеш, пеҥгыде кылым куча. Рвезе тений шке ийготанже-влак коклаште ече дене Марий Элын сборный командышкыже логалын.
– Ече дене мунчалташ, ечыгорнышто вийым тергаш чотрак келша. Ачам тале ечызе лийын. Тудым ончен кумылаҥынам, – манеш шкеже. – Район кўкшытыштє ончыко лекташ тыршем. Тений Волжскышто эртыше Марий Эл чемпионатын икымше этапыштыже кумшо верым налынам. Ӧрдыж кундемлашкат лекташ тыршем. Мутлан, Зеленодольскышто марафонышто шке ийготанем-влак коклаште нылымше верым налынам. А ончыкыжым эшеат сай результатым ончыкташ шонем.
– Максим тыршыше рвезе. Кеч-могай игечыште тренировкыш лектеш, – манеш физкультурым туныктышо А.Семёнов. – Пошкудо Татарстаныште тӱрлӧ кужытан ечыгорнышто вийжым терга, призёр радамыш логалеш. Кеҥежым Волжскышто, Яльчик ер воктене, сборышто лийын. Сандене теле тургымлан физически сайын шуаралтын, ямдылалтын. Но икте лӱдыкта: самырык-влаклан вигак кугу нагрузкым пуаш огеш кўл. Организмым эркын-эркын туныктыман.
Е.Эшкинина.
Снимкыште: М.Степанов – физкультурым туныктышо
А.Семёнов дене пырля школын ече базыштыже.
Авторын фотожо.
