Марий Эл вуйлатыше Александр Евстифеев граждан-влаклан приемым эртарен. Тарватыме йодыш-влак тӱҥ шотышто ондалалтше дольщик-влак да корным тӧрлатыме дене кылдалтше лийыныт, палдара Марий Эл вуйлатышын организаций-аналитике виктемже.
Республикыште илыше куд еҥ Александр Евтифеев да профильный министерстве вуйлатыше-влак деч шке йодышыштлан вашмутым налыныт.
Марий Эл вуйлатыше деке приемыш эн ончыч Кугу Отечественный сарын участницыже Алевтина Фёдоровна Черепанова толын. Ӱмаште тудо Александр Евстифеевын ветеран-влак дене Сеҥымаш кече вашеш вашлиймаштыже лийын. Тиде вашлиймаш нерген поро шарнымашым кодаш манын, республик вуйлатышылан тудо тунам ыштыме тӱшка фотографийым пӧлеклен да шке юбилейышкыже ӱжын. Тений августышто Алевтина Фёдоровналан 95 ий темеш. Александр Александрович пӧлеклан тауштен, тудлан тазалыкым тыланен да вес вашлиймашке толаш ӱжын.
— Тушто адакат фотографийым ыштена да тунам мый тыланда тудым пӧлеклем, — каласен вуйлатыше.
Советский районысо Вечын школын директоржо Алевтина Мусина Вечын – Ӧрша – Кӧрдемтӱр корным ачалаш кӱлмӧ нерген ойлен. Вет тиде корно дене школ автобусат кудалыштеш.
— Ӱмаште районышто эртарыме вашлиймашда деч вара «ий тарванен» — корным тӧрлаш тӱҥалыныт. Но паша кум ий шуйнышаш. Кузе лийман? – йодын школ директор.
Тиде йодышлан республикысе транспорт да корно озанлык министрын алмаштышыже Александр Желонкин вашештен. Тудат пашан кум ий шуйнышашыж нергенак каласен. Тунам мутланымашке Александр Евстифеев ушнен.
— А сентябрьыште тыгай корно дене йоча-шамычым кузе коштыктена? Кызытеш полшен кертше ойым темлыза. Мутлан, кеч лакылам петырыман. Верыш лекташ да мом ышташ лиймым рашемдаш лу кече жапым пуэм. Сентябрь гыч корно тунемше-влаклан кудалышташышт лӱдыкшыдымӧ лийшаш, — каласен тудо.
Корным ачалаш кӱлмӧ йодыш денак Йошкар-Ола гыч Марина Николаева толын. Тудо Йошкар-Ола – Санчурск, Йошкар-Ола – Козьмодемьянск кугорнылам кунам тӧрлаташ тӱҥалме нерген йодын.
Татьяна Шубина ден Светлана Рыжакова приемыш ондалалтше дольщик семын толыныт. Нуныланат полшаш йӧным мумо нерген каласеныт.
Образований пашаеҥ-влакым ушышо профсоюз-влакын вуйлатышышт Елена Ступина Козьмодемьянскысе межрайонный эмлымвер пелен сосудистый отделенийым почмо йодыш дене приемыш толын. Республикын тазалыкым аралыме министрже Марина Панькова тидым тений ноябрь мучаште ышташ палемдыме нерген каласен. Кызыт эмлымверыште пӧлем-влакым ямдылат. Тыгак министр палдарен: Козьмодемьянскысе тиде эмлымверлан медицине оборудованийым налаш Россий Президентын резерв фондшо гыч тений 55 миллион утла тенге ойыралтын, тышеч 33 миллионжо – сосудистый рӱдерым почшашлан.
Л.Камалетдинова.
