Тиде чолга рвезе Денис СМИРНОВ дене ссуз ден вузышто тунемше-шамычын ярмиҥгаштышт палыме лийынна. Тудо Оршанкысе шуко профилян колледжыште тӱҥалтыш класслаште туныктышо лияш ямдылалтеш. Полмезе бисер, изи шер гыч тӱрлӧ пушеҥгым, пеледышым ыштылеш. Кызыт шкаланже да йолташыже-влаклан гына огыл, йодмо почешат ышта, ужалашат луктеш. Пашаже-шамыч регион кокласе, тӱнямбал конкурсышто ятыр гана сеҥышыш лектыныт.
– Денис, бисер дене ыштыме пашат моткоч ойыртемалтше. Но тиде сомыл утларакшым ӱдыр-влаклан келшен толеш. А тый тиде кидпашалан кузе кумылаҥынат?
– Бисер дене тӱрлӧ ӱзгарым ыштылаш кандаш ияшем годымак тӱҥалынам. Икымше гана ты сомыл дене лагерьысе кружокышто палыме лийынам, а варажым школнан директоржо Ирина Васильевна Зиминан тиде кидпашалан шӱман улмыжым пален налынам. Лач тудак мыйым шуарен, туныктен шоген. Умбакыжым шке вияҥынам, интернетыште, журналыште бисер гыч тӱрлӧ арверым кузерак оҥайын ышташ лиймым онченам. Тӱҥалтыште янлык-влакым «шочыктенам» гын, варажым пеледышыш кусненам.
– Тений рвезе-влак туныктышылан шагал годым тунемаш каят. А тылат тиде профессий мо дене лишыл?
– Мый шкеже Угарман кундем Тонкино район Мартяхино ялыште шочын кушкынам. Варажым ешна дене Шахунья олаш илаш кусненна. Школышто тунеммем годым врач лияш шоненам, но лекше амаллан кӧра туныктышын корныжым ойырен налынам. Кызыт тидлан пырчат ом ӧкынӧ. Мутат уке, ӱдыр-шамыч коклаште шкетын улмем изиш йӧндымылыкым луктеш, но тидланат тунемынам. Икшыве-шамыч дене пашам ышташ путырак келша, нунылан шинчымашым пуэн кертмем мылам нимо деч коч шерге.
– Шижалтеш, тый ик верыште шинчен от турко. Шкендым тӱрлӧ могырым шуарет…
– Марий кундемыш тунемаш толмо мылам у корным почын. Кызыт мый Российысе доброволец-влак ушемын Оршанкысе пӧлкажым вуйлатем. Бисер дене кылдалтше тӱрлӧ конкурсышто мастарлыкем ончыктем. Диплом ден грамотшо ынде икмыняр погыненыт. Эн кугу сеҥымаш семын «Творчестве: йӱла ден тачысе илыш» Нижегородский областьыште эртыше конкурсышто «Бисер гыч пунымаш» номинацийыште кумшо степенян диплом дене палемдалтмем да шке кид дене ыштыме арвер ден сату-влакын Йошкар-Оласе ярмиҥгаштышт «Мастар-влакын олашт» номинацийыште икымше верыш лекмым шотлем. Тыгак тений «Абилимпикс» чемпионатыште тӱҥ эксперт лийынам.
– Калыкнан тӱвыраже поян, тӱрлӧ шӧрынан. Марий Элыште тый тидым шижын шуктенат але уке?
–Шочмо кундемыштем марий-влак улыт, но шагалын. Шукыжым руш-влак илат, сандене марий тӱвыра нерген ковамын ойлымаж гыч гына паленам. А тыште мылам чылажат у семын почылтын. Поснак марий куштымаш мыйым авалтен, тыгак марий пайремлаш кошташ моткоч келша. Пеледыш пайремыште кажне гана лияш тыршем.
– Ончыкылан могай шонымаш дене илет?
– Тӱҥжӧ сайын тунемын пытараш, а вара илыш ончыкта. Шке шонымем калыклан почын ончыкташ ом тырше, молан манаш гын пиал тымыкым йӧрата.
Лидия ШАБДАРОВА.
