Совет Союз Ушем Герой Михаил Михайлович Кологривовын шочмыжлан 19 ноябрьыште 100 ий темын.
Чапым налше лётчик-истребительым, землякыштым, шарналтыме амал денак Кокшайск селаште, тудын бюстшо воктене, митинг эртен. Михаил Михайлович тыглай пашазе еш гыч. 1939 ийыште Ейскысе военно-морской авиационный училищым тунем лектын. Кугу Отечесвенный сар тӱҥалме пагыт гычак старший лейтенант Кологривов Черноморский флотын действующий армийжын истребительно-авиационный полкыштыжо служитлен. Сар пытымылан эскадрилий дене майор званиян командоватлен. Ныл ий жапыште 600 наре боевой вылетше лийын, южышто 67 кредалмаште участвоватлен. Лӱддымылыкшылан тудым кум гана Йошкар Знамя орден, тыгак Александр Невскийын орденже, Йошкар Шӱдыр орден да ятыр медаль дене палемденыт. 1944 ий 5 ноябрьыште Совет Ушем Герой лӱмым пуэныт. Сар деч вара Кологривов теҥыз авиацийыште служитлен, Военно-воздушный академийым тунем пытарен, авиационный истребительный полкын командирже лийын. 1957 ийыште подполковник званий дене запасыш каен. 1954 ийыште тудо уке лийын. Пытартыш илыш корныш Одессыште ужатеныт.
М.М.Кологривовлан шарнымаш оҥа кызыт Звенигово район Какшамарий школын да Кокшайск селасе йочасадын пырдыжылаштышт кечат. Геройым шарналтыме митингыш верысе кучемын, ветеран-влак организацийын, черкын еҥже, «Святой благоверный князь Александр Невский» военно-патриот клубын ӱдыр-рвезыже-шамыч миеныт. Республикысе Кугыжаныш Погын вуйлатышын алмаштышыже Наталья Козлова лӱмло землякым шарнымылан да самырык тукымым патриот шӱлышеш шуарыме пашам шуйымылан тауштен.
С.НОСОВА