ЙӰЛА

Вӱд модеш, телымат йӱштылаш ӱжеш

Вӱд — илыш тӱҥалтыш. Марий йӱлам кучышо-влак тиде кечым «Юмын чыкыме кече» але «Вӱд модмо кече» маныт. Грек йылме гыч «крещаю» мутым кусараш гын, «вӱдыш пурем» манмым ончыкта.  Эрвел элласе шуко калык ты кечын вургемге Иордан эҥерыш пурат. Нуно юмо дечын поро да ласка илышым йодын сӧрвалат.  Икманаш, вӱд да вӱдыжгӧ гыч чыла илыше кушкыл ылыжеш. Кушто вӱд уке, тушто илышыжат уке.

19 январьым онаеҥ каҥашын пунчалже почеш Вӱд модмо кечылан шотлыман. Ты кечын мланде кече йыр пӧрдмӧ орбитальный корнын шыртышкыже шинчеш, молан манаш гын 19 декабрь гыч 19 январь марте мланде кече деке шке орбитальный корныж дечын икмынярлан торла. Саде пагыт кечын шыртше тарванымым ончыкта. Шырт тарваныме кечыжым Шорыкйол маныт. Шырт тарванымеке, кечын утларак ырыктымыжымат шижына. Тиде жапыште кечыйол вӱдым утларак шырата, кӱшыл юмо мландылан кидшым шуялта. Тиде тат — Мланде ылыжме жап.  Вӱдын левен кайыме пагытше виян лиймыжым ончыкта, кӱшыл да ӱлыл пасуэт магнитный кылым кучат.

Лач ты кечын эр-эрдене вӱдым памаш гыч янда атыш темыман. Тылзылан тура шындыман, кӱшыл юмо шке вий-куатшым саде вӱдлан пуа. Тиде вӱдым подылмеке, капкылымат мушман, пӧрткӧргымат  эрыктыман, чыла осалым, нелылыкым, сулыкым мушкын колтыман. Саде вӱд идалык мучко кугу вийым кучен шога.

Икмыняр кундемыште марий калык Вӱд Авалан  посна ял кумалтышымат эртарен. Чес пӧлек шотеш колым, шем агытаным я шем лудым пуэныт. Но тыгай кумалтыш мондалташ тӱҥалын. Ты татыште вӱдын вийже эн тале лиеш. Айдемынат кугу ужашыже лач вӱд гыч шога, санденак пӱртӱс вий дене кугу кылым куча.  Мончаш пурымо годымат Вӱд Ава деч вий-куатым, кӱшыл уш-акылым, кужу ӱмырым, пеҥгыде тазалыкым, ешыште ваш-ваш умылымашым, йӧртамышым, порым, волгыдым, яндарым да ласкалыкым йодын пелештыман.  

Пелештыме шомак

А таче Вӱд модмо кечет, Вӱд Ава, Вӱд Суксо, йывыртыктен толын шого ший памашет дек. Толын шогалын, ший вӱдетым налын, тудын дене  мушкылтын, таум ойлен, пелештен шогем. Ший вӱдет гай вий-куатым поген шоген, капкыл тазалыкым, кужу ӱмырым йодам. Сурт-печышкем наҥгаен, сурт еш дене мушкылтын, яндар вӱдетым подылын, йодам тазалыкым, кӱшыл уш-акылым, аралтышым да серлагышым. Вольыклан йӱктем, тӱлан да таза лийже. Вӱд Авалан, Вӱд Суксылан алал лийже, чыла неле да осал деч ойырыза.  Ончыкыжымат сай илышым виктарен шогыза. Мыйын пелештымем ашеш кайыже, алал лийже.   

Онаеҥ-влак В.М.АКТУГАНОВ, В.Ф.СМИРНОВ

Опубликовать в Одноклассники

Добавить комментарий