ЙӰЛА МАРИЙ ЙӰЛА

Ӱярня кашта гыч келанен мунчалтеныт

Ӱярня йор-йор, мелна чыж-чож! Тыгай саламлымаш шомак дене тӱҥалын Ӱярня пайрем Параньга район Усола ялыште кодшо каныш кечыште. Ялысе модмашке эн ончыч йӱштӧ Теле унала тольын. Шке койышыжым, кызытеш эше оза улмыжым ончыкташ тӧчен. Туге гынат йоча-влак Шошым рӱж кычкырен ӱжыныт.

Маска шке вынемже гыч помыжалтын лектын, йӱк-йӱаным колын, таргылтыш чодыра гыч йомын лектын. Пайремыш погынышо икшыве-влак кокла гыч нуно Маша ден Дашам вӱден, пич чодыраш Шошым кычал каеныт. Ик жап гыч Шошым издерыш шынден, шӱшкалтыме йӱк почеш, пайремыш Шошым конденыт. Но йӱштӧ деч йолван шовычеш пӱтырналтше вӱдылкам почын колтат, а тушто – Вувер кува!

Теле ден Вувер кува оза улмыштым ончыкташ тыршен, шуко жап йоча-шамычлан туштым туштен, оза улмыштым пеҥдыдемден ӱчашеныт. А ты гутлаште куэр лоҥга гыч шып гына Шошо шыргыжалын, мурым муралтен толын шогалын.

Пайрем гыч каяш тореш лийше йӱштӧ Телым поктен колтымек, ял калык Ӱярням вашлийын. Самовареш шокшо шудо чайым шолтеныт. Тыштак мелнам кӱэштын, пайремыш толшо кажне еҥым сийленыт.

А пайремым вӱдышӧ-влак тӱрлӧ онай модыш дене йоча-шамычым модыктеныт. Усола ял калык Ӱярня кашта да курык гыч келанен мунчалтен, марий муро сем почеш мурен-куштеныт.

Г.Рублёва.

Р.Чепакова.

Опубликовать в Одноклассники

Добавить комментарий