Шукерте огыл Йошкар-Ола воктенсе «Корта» ече базыште спорт туризм дене Российын первенствыже, всероссийский таҥасымаш эртыш. Тушто Российын 23 регионжо да Казахстан гыч 280 спортсмен вийжым терген. Марий Элын чапшым «Азимут» ден «Роза ветров» йоча-юношеский рўдер-влакын (тренер-влак С.Фёдоров, Д.Ибрагимов, О.Брачёва, В.Стапеев, В.Павлов, О.Семёнов) воспитанникше-шамыч араленыт.
Участник-влак кум кечыште палемдыме верым, тўрлӧ чаракым сеҥен лектын, ече дене писын мунчалтен эрташ тыршеныт. Мемнан мийыме годым Казастан гыч толшо спортсмен-влак пушеҥгыш кандыра дене кўзат ыле. Мўндырнак огыл корем гоч пырням пыштыме «кўвар гоч» чымалтше-шамыч шинчалан пернышт. Тыгай чаракше – ныл этап. Мутат уке, южышт йоҥылалтыт, кандырашт товаҥалтеш… Тыгодым шергакан жапыштым йомдарат.
– Мыланна чылажат келша. Тиде таҥасымаште вуят ончыко мо лийын кертшаш нерген шонен моштышаш, кап-кылат лывырге да физически ямде лийшаш, – ойлат участник-шамыч.
– Мыланем спорт туризм келша. Тиде секцийыш ныл ий коштам. Тренировкылан кечеш ныл шагат наре кая. Ты видыште нелыже – кандырам нумалаш. Всероссийский таҥасымаште икымше гана вием тергенам, – ойла шке тўшкаштыже кокымшо верым налше Марий Турек гыч Ольвия Васинкина (тренерже Л.Семёнова).
– Чын. Ӱдыр пеш тыршыше, техникыжат уло. Поснак ече дене таҥасымаште ойыртемалтеш. Тыгак Курыкмарий район гыч Костя Рожковым палемдыман. Тудо икымше верым налын. Ты гана дистанцийын кужытшо – 6 километрат 200 метр, – мокталтыш спорт туризм дене спорт мастер, тренер О.Брачёва.
– Тений молгунамсе дене таҥастарымаште Россий кўкшытан таҥасымаште эн шуко участникым чумырген, манаш лиеш. Вер-шӧр, условий келшен толшо. Организатор-влакат кумылын ушненыт, сай кўкшытыштӧ эртарыме. Куандара: мемнан-влак ончылно улыт. Йошкар-Ола, Шернур, Кужэҥер, Курыкмарий, У Торъял район гыч 45 участник вийжым терген, – мане Россий спорт туризм федераций президиумжын членже Ю.Калаев.
Икымше кечын «дистанций-ечыгорно» дисциплиныште верысе спортсмен-влак путырак сайын выступатленыт, 12 гыч 8 призан верым налыныт. Икымше верыш К.Рожков, Р.Урдяков, К.Мубаракшина лектыныт.
Кокымшо кечын «дистанций-ечыгорно-кылдыша» дисциплиныште мемнан спортсмен-шамыч коклаште вич призёр лийын. Кумшо кечын «дистанций – ечыгорно-группо» дисциплиныште Марий Эл гыч спортсмен-влаклан таҥасымаш ныл шӧртньӧ, ик ший, ик бронзо медаль дене мучашлалтын.
Команде-влак коклаште Российын первенствыштыже да всероссийский таҥасымаште Марий Элын командыже икымше верым налын.
Туризм спортын моло видше деч пеш ойыртемалтеш. Тыште кидат пеҥгыде, шуаралтше, йолат писе, тыгодым уш-акылат яндар да пўсӧ лийшаш. Койыш-шоктыш сайынак пеҥгыдемеш. Чыла снаряженийым погымек, вачўмбалан 6 килограмм утла нелытан котомкам нумалын сеҥыман. Ты видыште заниматлыше айдемын тўрлӧ качествыже вияҥеш. Илышыште туризм кеч-могай неле ситуаций гыч лекташ полша, уш-акылым вияҥда.
Е.Эшкинина.
