СОЦИАЛ ИЛЫШ

Вучен шуктеныт – «канде тул» толын шуын

Кодшо кечылаште Марий Элыште эше вич илемысе калыклан куанле тат толын шуын – Медведево районышто илыше кок тӱжем наре еҥ ласкан шӱлалтен, вет нунын суртышкышт газым пуртеныт. 

Нужъял поселкым, Нужъял, Нужмучаш, Яныкайсола да Лӱльпан ял-влакым ушышо межпоселковый газ пучым торжественно почыныт. Ынде 633 пӧртым (тышеч кандашыже – шуко пачеран), тыгак

Яныкайсолаште верланыше школым «канде тул» полшымо дене ырыктат.

Газ пучым почмаште Марий Эл вуйлатыше Александр Евстифеев лийын. Тидын дене саламлышыжла, тудо палемден: тышке шокшо икымше лум дене пырля толын.

— Газ – тиде эн ончычак илыш качестве. Тыгак тудо озаватын кидшым кандара. Ынде пу ден шӱ огыт кӱл, сандене йоча-влаклан шукырак жапым ойыраш лиеш, — каласен А.Евстифеев да проектым ыштыше, чоҥышо-влаклан чылаштлан тауштен.

У пучын кужытшо — 25 километрат пеле. Тудым жапыштыже, срок дене келшышын, пашаш колтеныт. Тидлан окса «Ял кундемлам 2014-2017 ийлан да 2020 ий марте жаплан икшырымын вияҥдымаш» федеральный целевой программе почеш «Газпром» гыч ойыралтын.

— Лишыл кок-кум ий жапыште пӱтынь республикыш газым пуртена манын ӱшанена, — палемден республик вуйлатыше.

2018 ий тӱҥалтышлан Марий Элыште 88,7 процент кумдыкышто газ пурталтшаш. Яллаште гын 75 процент деч изиш утларакыш пучым шупшын шуктышаш улыт. Тыгодым Россий мучко ты жаплан сӱрет теве могай лийшаш: элыште чылаже 54 процент кумдыкыш «канде тул» миен шушаш, яллаште 48 процент нарыш шупшын шукташ палемдалтеш.

— Шушаш ийын Шернур районышто газ пучым пашаш колтышаш улына. 2018 ийыштак Кужэҥер, У Торъял да Курыкмарий районлаште шупшаш тӱҥалаш палемдыме, — палдарен «Газпром газораспределение Йошкар-Ола» ООО-н генеральный директоржо Александр Еремин.

Л.Камалетдинова.

Опубликовать в Одноклассники

Добавить комментарий