Шернур район Чылдемыр ял илемыш пурышо Нольыкмарий, Пӱнчерйымал, Тумерсола да Нурсола яллаш пурышо корнылаш тыгыде кӱм шарымым ончен, верысе калыкын кумылжо мыняр-гынат нӧлталтын. Шукеш огыл, тыште шошо ночкышто да йӱр деч вара кудал эрташ лийдыме ончычсо тазылаҥше шунан корно шарнымашешышт гына кодеш.
Ялын старостыжо Виталий Березин деч Пӱнчерйымал ялышкыже корно шотышто шонымашыжым каласаш йодмеке, вигак руале:
— Йӱраныште але шошо вӱдшор годым шке толын ончыза ыле. Тыгай пагытыште корно могайышке савырнымым ужде, тудын нерген тидым пылыдыме еҥлан ойлашыжат нимолан, садак огеш умыло. Старосто семын мый ты корным ыштыкташ 17 ий толашен коштынам, республикыште кушко гына миен омыл. Москвашкат шуынам. Ынде теве тений шошым ышташ тӱҥалыныт, ноябрь кыдаллан мучашке шукташ шонат такше.
Яллаште старостым ойырен шогалташ тӱҥалме жап годсек ялвуйын пашажым шуктышо еҥлан ӱшаныде от керт. Да ял калыкшат чапле корным вучен ноен, очыни. Южышт дене кутырымо годым тудын нерген мут лекте гын, ала-молан ӱшаныдымыла, кумылышт волен пелештат. А вет корныжо шинчаончылныштак вашталтеш.
Йошкар-Ола гыч «Волгаспецстрой» ООО-н пашазыже-влак мемнан миен лекме кечын корно полотнош ошма лончым шареныт, почешак тыгыде кӱым вакшыныт. Корныжым мучко гаяк нӧлтен шуктеныт, пыртак кужытышто веле кодын.
— Тачысе кечылан ӱлыл да кӱшыл лончо тыгыде кӱм оптен шарена, пеҥгыдемдена, — паша кузе кайыме дене палдара организацийын прорабше Алексей Уланов. — Ошмам 740 метр, кӱм 720 метр кужыт шарыме. Нольыкмарий ден Пӱнчерйымал ялла коклаште, Тумерсола ден Нурсола яллаш корно ушнымо марте, тиде кечылаште шукташ шонена. Ыштышаш корнын чумыр кужытшо — кок меҥгат 290 метр. Мланде полотно лопкыт 10 метр лиеш. Автомашиналан кудал эрташ кандаш метр лопкытан ышталтеш.
Кумданрак — «Марий Эл» газетын
2017 ий 7 октябрьыште лекше номерыштыже лудын кертыда.
Анатолий АНДРЕЕВ.
М.Скобелевын фотожо.
