Рушарнян, 13 октябрьыште, пӱтынь Российыште ялозанлык да перерабатыватлыше промышленность пашаеҥ-влак профессиональный пайремыштым палемдаш тӱҥалыт.
Марий Элысе мланде пашаеҥ-влак шке пайремыштым начар огыл лектыш дене вашлийыт. Мутлан, пырчым 260 тӱжем тонным поген налыныт, тидыже кодшо ийысе деч 7 тӱжем тоннлан шукырак. Кажне ушкаллан шотлымаште лўштыш кугемын. Тўшка озанлык-влак дене пырля фермер-шамычат изи огыл ошкылым ыштеныт. Тидлан нунылан фермер озанлыкым почаш да вияҥдаш, тыгак фермер озанлык негызеш еш фермым почаш полшышо кугыжаныш программе йӧным ыштеныт. Грантым налше-влак радамыште Советский район Кужмарий кундем гыч А.Добровольский ден С.Гусеват улыт.
Сергей Александровичын кызыт коло кок вуй ушкалже, тыгак ятыр шорыкшо улыт. Нуным шогалташ Руясола комплексым шкаланже налын. Ончычшо тыште «Молочные продукты» ООО ушкалым ашнен. Грант дене фермер тӱж туна-влакым, тыгак шым тӱрлӧ ялозанлык техникым, оборудованийым, агрегатым налын. Вет тудын 231 гектар мландыже уло. Тушто Гусев шыдаҥым, шожым, шӱльым ончен куштен да поген налын. Кум еҥым пашашке налын.
А.Добровольскийынат паша саскаже коеш. Тудын мландыже 300 гектар кумдыкым айла. Грант оксам техникым налаш кучылтын. Ынде тудын пареҥгым лукмо комбайнже, тракторжо, моло техникыже улыт. Пасуштыжо тений шожым, шыдаҥым ончен куштен, нылле гектар пареҥгым шынден. Тудат кум еҥым пашашке налын. Ынде панкрутыш лекше «Большевик» колхозын ушкал комплексшым налаш документым, еш фермым почаш бизнес-планым ямдыла. Ме фермерын Шуарсола ял воктене верланыше, нылле утла гектарым айлыше пареҥге пасуштыжо вожсаскам лукмаште лийна. Тыште «GRIMME» пареҥгым лукмо немыч комбайным, вожсакам копалке дене лукшо, пасу гыч левашыш шупшыктышо, шудым солышо трактор-влакым, тыгак погаш полшаш толшо калыкым ужна.
— Кӧн яра жапше уло, тышке толынна, — каласышт ӱдырамаш-влак. – Алексей Владимирович пашадарым паша деч вара тудо кечынак пуа. Сандене толаш кумылан-влак ятырын лийыныт. Вожсаска чапле лектышан шочын, погаш кумыл уло.
В.СМОЛЕНЦЕВ
Снимкылаште: механизатор Р.Кудрявцев; пареҥгым погышо-влак В.Колесникова, Л.Яспарова да Г.Баранова.
