Республикысе вольык ончышо-влак паша лектышым кугемден толыт.
Кызыт республикыштына кандашле тӱшка озанлык шотлалтеш. Тышечын нылле кудытыштыжо ушкалым ашнат, шӧрым ужален, оксам ыштат. Ялозанлык да продовольствий министерствын уверже почеш, март мучашлан тӱшка ден фермер озанлыклаште 15,8 тӱжем утла ушкалым ашненыт. Тидыже кодшо ийысе тыгаяк жапысе деч 525 вуйлан шукырак. Морко, Кужэҥер, Медведево районлаште 169, 149 да 130 ушкаллан ешаралтын. Тыгодымак Курыкмарий, У Торъял, Марий Турек, Шернур да Советский районлаште шагалемденыт.
Кажне ушкаллан шотлымаште лӱштыш кече еда гаяк ешаралт толеш. Кызыт озанлыклаште сутка еда 21 килограмм дене шупшылыт, кодшо ийын ик килограммлан шагалрак лийын. Эн ончыко У Торъял район лектын. Тыште 26,4 килограмм дене шупшылыт. Тыгай кӱкшытыш эн ончычак «Первый май» колхозын сай лектыш дене тыршымыжлан кӧра шумо. Кокымшо верым Медведево район айла, 25,6 килограмм дене лӱшта. Тиде районышто «Семеновский», «Марийский» акционер ушем-влак ойыртемалтыт. А теве Звенигово район эн почеш кодеш, улыжат 12,5 килограмм дене шупшылеш. Советский ден Кужэҥер районлаште 16,1-16,7 килограмм дене веле лӱштат.
Ял калык деч уто шӧрым погымо паша ушнен толеш. Март мучашлан 1480 тонным, але кодшо ийысе тыгаяк жапысе деч 164 тоннлан шукырак, погымо. Тыштыже фермер-влакын шукырак ушкалым ашнаш тӱҥалмыштым да тыгодымак шӧрымат утларак ужалымыштым палемдыман. Морко районышто ты паша утларак сайын ушнен толеш. Талук тӱҥалтыш гыч тыште 650 наре тонным погымо, кодшо ийысе кӱкшытым шӱдӧ утла тоннлан саемдыме. Тыште частный предприниматель-влак деч посна «Передовик» ялозанлык предприятият ял калык деч шӧрым пога. Талук тӱҥалтыш гыч шотлымаште 150 наре тонным налын. Тыгаяк поро пашам У Торъял районысо «Первый май» ялозанлык артель шукта. Тудо талук тӱҥалтыш гыч шотлымаште кандашле утла тонным налын.
Волжский районышто тений калык деч уто шӧрым погымо пашам сайынрак ворандарен колтеныт. Идалык тӱҥалтыш гыч тыште 181 тонным погеныт, тидыже кодшо ийысе тыгаяк жапысе деч 78 тоннлан шукырак. Тыгодымак Параньга, Кужэҥер, Шернур да Советский районлаште мӧҥгештыныт.
В.СМОЛЕНЦЕВ
