«Марий Эл Дорстройын» Звениговысо филиалже Кокшайск-Красногорский автомобиль корнын йыр эртен кудалме участкыжын 5-ше ден 8-ше меҥге коклажым олмыкта. Контрактын акше — 40 миллион наре теҥге. Ты паша Марий Эл Республикым вуйлатышын кӱштымыж почеш шукталтеш, вет автомобилист ден верысе калык корным олмыкташ тӱҥалмым шукертсек вученыт. Ты учаске 12 ий утла олмыкталтын огыл.
Шаланыше ты корнылан калык деч вуйшиймаш Россий президент Владимир Путинын Марий Элым вуйлатыше Александр Евстифеевлан тений июльышто кучыктымо «ужар папкыште» лийын. Республикым вуйлатыше тидым вигак контрольыш налын.
Тиде кечылаште ӱмбач пӱчкын налме тошто корно лончым у дене вашталтат. Пашам писемдаш да сай качестве дене ышташ кӱкшӧ лектышан фреза кучылталтеш.
— Шукертсек кучылтмо технологий корно шелышталтме деч кораҥаш полша. Тудо ныл ий чытышаш. Чаплым ышташ тыршена, вет шкалан ыштена, — манеш «Марий Эл Дорстрой» АО-н генеральный директоржо А.Карташов.
Кокшайск-Красногорский корно республикылан ик эн кӱлешалан шотлалтеш, тудо регионысо тӱҥ корно радамыш пурталтын. Тудын дене суткаште 2 тӱжем гыч 3,5 тӱжем марте тӱрлӧ автомашина эрта. Строитель-влак тений кум километран ты участкым олмыктымо дене гына огыт серлаге, 2018 ийыште 8-ше гыч 12-шо километр коклам тӧрлат.
А.АНДРЕЕВ.
