Тиде рвезе дене самырык туныктышо-влакын «Педдебют» конкурсыштышт палыме лийынна. Тушто Евгений ПИРОГОВ шкенжын мастарлыкшым сайын ончыктен, санденак Таирыш, самырык педагог-влакын форумышкышт путёвкым кучыктеныт. Кызыт тудо У Торъял районысо администрацийын образований пӧлкаштыже пашам ышта.
– Евгений, икымше вашлиймашна годым школышто пашам ыштем манын ойлышыч…
– Мый У Торъял район Овалже ялыште шочын-кушкынам. Индешымше класс марте тушто тунемынам. А варажым Руэмысе лицейыш кусненам. Тушто физике ден математике классыште тунемынам. Очыни, умыленам, тиде профессий пӧръеҥлан утларак кӱлешан, паша верымат муаш куштылгырак. Тыгак ончыко вияҥман, кушман.
Школ деч вара Марий кугыжаныш университетын физике ден математике факультетшым тунем пытаренам. Вузым тунем лекмеке, Немда школышкемак пӧртылынам. Математикым ныл ий туныктенам.
– Самырык специалист семын тӱҥалтыште лӱдмашым шижын отыл?
– Шочмо школышкемак толынам, сандене пырчат лӱдын омыл. Туныктышо-шамычат палыме, лишыл улыт, нуно мыланем эре полыш кидым шуялтеныт. Кокла класслаште тунемше-шамыч дене тӱҥалтыште кылым муаш нелырак лийын гын, варажым икте-весе коклаште умылымаш лектын. А кугурак ӱдыр-рвезе-шамыч дене вигак икойым муынна.
– Тынар жап икшывым туныктымеке, вес вере куснаш неле лийын огыл?
– Йоча-шамыч дене пашам ышташ моткоч оҥай. Шинчашкет ончымыштак мом шога. Мом палыметым нунылан туныкташ, вуйышкышт шыҥдараш нимо деч коч шерге. Санденак школ деч посна изиш йокрокланем. Тыште утларакшым компьютер дене пашам ыштем, компьютер технологий дене кылдалтше специалист улам. Иктаж-мом ом умыло гын, мылам эре полшат, садлан у верыште паша шотышто нелылыкым шижын омыл.
Кызыт шке школем дене гына огыл, районысо чыла школ дене кылым кучем, йочасад денат. Тылеч посна самырык педагог-влакын районысо советыштым нылымше ий вуйлатем.
– Тидын нерген утларак палыме шуэш ыле.
– Ушемна самырык педагоглан эреак полша. Почылтшо урокым пырля ямдылена. Кызыт мемнан дене 36 еҥ шотлалтеш. Тиде 35 ияш марте туныктышо ден воспитатель-влак. Самырык педагог-влакын школыштым кажне ийын районышто эртарена. Мемнан деке тений гына тунем пытарыше кок еҥ ушнен. Иктыже Пектубай, весыже Элембай школышто пашам ышта.
– Ачат Немда школышто физкультурым туныктен, ече дене тренер, ятыр лӱмлӧ спортсменым ямдылен. Очыни, тыят спорт дене кылым кучет?
–Таза илыш-йӱлам кучаш тыршем. Футбол, баскетбол дене модам. Школышто пашам ыштымем годым образований пашаеҥ-влакын спартакиадышкышт ушненам. Командына кум ий почела икымше верым налын. Кызыт футбол дене ялысе командыште модам.
– Илышыштет школ эреак кугу верым налын?
– Туныктышо лияш, очыни, тиде пӱрымаш. Авам тӱҥалтыш класслаште туныктен, ача физкультурник лийын. Кызытсе пашамжат шинчымаш дене кылдалтын. Кӧ пала, ала жап эртыме семын пӱрымаш адак школышкак пӧртылта. Илена, ужына.
Лидия ШАБДАРОВА.
М.Скобелевын фотожо.
