23 январьыште Йошкар-Оласе Самырык-влак полатыште  республик кӱкшытан оборонно-массовый да военно-патриотический паша месячник стартым налын. Тудо Отечествым аралыше-влакын кечыштлан пӧлеклалтеш. Месячник 23 февраль марте шуйна.

Тудо тыгак 2019 ийысе юбилейный дате-влакым авалта: Ленинград  блокадым кораҥдымылан – 75 ий, Михаил Тимофеевич Калашниковын шочмыжлан – 100 ий, Афганистан гыч Совет войскам лукмылан – 30 ий.

Мероприятийыште общеобразовательный школлаште тунемше, патриотический клуб ден ушемлашке коштшо, кадет класслаште тунемше, салтак радамыш шогалшаш рвезе-влак лийыныт. Месячникым Марий Эл правительстве председательын икымше алмаштышыже М.Васютин почын. Тыгак Марий Эл правительстве председательын алмаштышыже С.Воронцов толшо уна-влакым шокшын саламлен.

Тӱрлӧ площадкыште спецназ войскан снаряженийже дене кылдалтше, «Ястреб» спецназ, ДОСААФ, 34096 №-ан воинский часть, военный комиссариат, «Воскресение» студент поисковый отряд дене палдарыше  выставке-влак лийыныт. МВД, МЧС, ДОСААФ гыч еҥ-влак пашашт нерген каласкаленыт.

А Марий Эл МВД пеленсе ОМОН-ын ончаш темлыме стрелковый оружий ден обмундированийыштым ужаш шукыштлан оҥай лийын. Кумылан-влак спецподразделенийысе боецын экипировкыжым, каскыжым, бронежилетшым  кучен да чиен ончен кертыныт.

Месячник жапыште республик кӱкшытан ятыр кугу мероприятийым эртараш палемденыт: школлаште класс шагатым, лӱддымылык урокым, видеолекторийым ончыкташ, тыгак военно-патриотический модмашым, тидлан келшыше тӱрлӧ акцийым эртараш.

Тыге ик тылзе Марий Элысе чыла общеобразовательный школышто, ты сфер дене кылдалтше клублаште военно-патриотический шӱлышан тӱрлӧ мероприятий эрта. Кажне школышто ты теме дене класс шагат, патырлык урок лийыт, шочмо элым аралымылан пӧлеклалтше фильмым ончыктат, экскурсий ден тоштерлашке лектыт…

Е.Эшкинина.