Медведево районысо Краснооктябрьский посёлкышто илыше Валентин Васильевич Жуковлан 13 ноябрьыште 100 ий темын.
Кугу Отечественный сарын участникше деке Марий Элын социальный вияҥмаш министржын алмаштышыже Э.Загрутдинов, Медведево районысо калыкым социально обслуживатлыме комплексный рӱдерын директоржо А.Нигмадзянова, Краснооктябрьский ял шотан илем администрацийым вуйлатыше Т.Козлова миеныт, лӱмгече озалан поро тыланымашым ойленыт, Россий Федераций президент В.Путинын саламлымашыжым, пӧлекым да пеледышым кучыктеныт.
Юбиляр Подольск олаште шочын. Фабрик-завод ученичестве школым тунем пытарымыж деч вара Калинин лӱмеш механический заводышто пашам ыштен. Мӱндыр Эрвелне служитлен. Сар годым 1-ше украин фронтышто кредалын. Фашист пуля логалмылан, гангрене тӱҥалмылан кӧра ик йол деч посна кодын. 1944 ийыште Подольскышкак пӧртылын, но вара Тула областьысе Козлово селаш куснен, туштак ешым чумырен. Кассе аппарат ден возымо машинкым олмыктен, «Защита страны» колхозышто объездчиклан ыштен.
М.ИВАНОВА
