УВЕР ЙОГЫН

Верла гыч увер: Форум чумырен

5 мартыште Кужэҥер районысо Тӱвыра да каныме рӱдерыште калык палынак шуко лийын. Тудым икымше ӱдырамаш форум сылне пайремыш чумырен. 

Ӱдырамаш – виян вуйлатыше, сай пашаеҥ, пелаш, ава… Торжественный мероприятийыште эн сай 26 ӱдырамашым тӱрлӧ номинацийыште палемдыме да Кужэҥер районысо муниципал образованийын, тыгак Ӱдырамаш ушемын таумутыштым кучыктымо. Пашан ветеранже С.Порфирьева, осеменатор Г.Домрачева, тӱвыра пӧртым вуйлатыше Т.Поликарпова, врач Р.Попова, педагог Л.Поликарпова, шуко шочшан самырык ава А.Смоленцева гай чолга да уста ӱдырамаш-влак районым чапландарат. Нунын дене пашам пырля ыштыше йолташышт, лишыл еҥышт, родо-тукымышт кугешнат.

Ӱдырамашын тӱнямбал кечыже вашеш эртаралтше пайремым районысо самодеятельный артист-влак Евгений Каменщиков, Татьяна Поликарпова, Ольга Сергеева, Пироговмыт еш сӧрастареныт. А Кужэҥер тӱҥ школын тунемшыже-влак ӱдырымашын мер илышысе рольжым театрализоватлыме представлений гоч ончыктеныт.

М.ИВАНОВА.

Опубликовать в Одноклассники

Добавить комментарий