СЫЛНЫМУТ

А ШӰМ САДАК ЙӰЛА ТАЧАТ, ЭРЛАТ…

Нина ЩЕРБАКОВА У Торъял район Шӱвылак ялыште шочын. Школым тунем пытарымеке, Фурманово оласе куымо фабрикыште мотальчицылан ыштен. Ялсовет вуйлатышын ӱжмыж почеш ялышке пӧртылмеке, клубышто пашам ыштен. «Почеламутым серкалыме тӱҥалтыш, очыни, тунам пышталтын, но сайын возкалаш да лудшылан темлаш кумло ий деч вара гына тӱҥалынам, – ойла автор. – Икымше почеламутлан шкенан ял гычак верысе самодеятельный композитор Калинин Эчук семым пыштен. Вара семын «Тыйын шинчат», «Маке пеледыш», «Пӱрымаш», «Йӧратенам тыйым», «Пел курым» муро-влак шочыныт.

Книгам лукташ самырык поэтесса Вера Гордеева-Армякова шӱкалтышым пуэн манаш лиеш. Почеламут сборникше дене палыме лиймеке, умылен: тудынат почеламутшо-влак калыклан келшат. Самырык годсо йолташыже Раиса Королеват ӱшаным шочыктен: «Книгам лукташ кӱлеш, калык вуча, луднеже», – ойлен. 2018 ийыште Марий книга издательствыште «Мый мураш шочынам» икымше книгаже лектын. Кокымшо книгаже – «Шӱмет шӱмемым паремда» – 2019 ийыште ош тӱням ужын.

– «Возкалаш мо тыйым тарата?» манын шукын йодыт. Вашмутем икте – пӱртӱсым йӧратем, калыкемым пагалем, йӧратымаш кумыл чонемым пойдара. Сандене шуко почеламутем йӧратымаш шӱлышан улыт Возаш неле але куштылго манын таҥастарен ом керт, кагаз ден ручкам кидыш налам гын, жапым ом шиж, почеламут але ойлымаш шочмешке чарненжат ом керт, – ойла илышым йӧратыше ӱдырамаш.

АЙДЕМЕ ТУКЫМЛАН

Лиеш тошкалтыш ден

Кӱзаш пеш писын,

Но лӱдыкшӧ лиеш

Чонлан волаш.

Айдеме ден лиеш келшаш,

Да койышым

Пален налмешке,

Тудын ден модаш.

Айдеме, манаш веле –

«Янлык» шучко:

Вот авалта, нулта,

Нула да шӱвалеш.

Огеш ончал шеҥгеке,

Колен кеч вочшо,

Гочет тошкалын,

Тӧршталтен куржеш.

Мутлан, тӧчет гын

Шылталаш тый тудым,

Алмаштышлан тыгай

Мут-влак шоктат.

Нӧлтал шында шомак ден

Тыйым кӱшкӧ

Да тыманмешке

Пӧрдыктен волта.

Варажым кормыжтен,

Ишен кучалын,

Шӱкшудо семын

Кӱрлын кудалта

Да игылт-воштыл

Ӧрдыж гыч ончалын,

Йолташла койын

Тыйым мыскыла.

Айдеме сын

чыланыштлан ок сите,

Ты койыш

Шуко еҥлан огеш тол.

Чылаже годым

Шижынат ок шукто,

Волгенче гай кертеш вашталт –

Шылтен ок тол!

Нина Щербакован поэзийже дене «Марий Эл» газетын 25-ше номерыштыже палыме лийза.

Опубликовать в Одноклассники

Добавить комментарий