2019 ий 29 ноябрьыште М.Шкетан лӱмеш Марий драме театр 100 ияш лӱмгечыжым палемдаш тӱҥалеш. Тенийысе чыла мероприятий тиде дате дене кылдалтын. Тышеч иктыже – «Ачийжат-авийжат» спектакль.
М.Шкетанын пьесыж почеш шындыме тиде чапле спектакльым 8 июльышто артист-влак Морко район Унчо селаште модын ончыктат. Модаш тӱҥалыт клубысо сценыште огыл, а ялысе музей комплексыште, в ет спектакльыште действий лачшымак Савлийын оралте коклаштыже эрта.
Икманаш, декораций шотышто азапланышаш уке, тудо ямде. Кеҥеж умыр кастене ача-ава ден икшыве-влак коклаште мо ышталтмым шке шинча дене эскераш пеш оҥай лиеш, шонена.
Спектакльыште РФ-ын сулло артистше-влак О.Кузьминых, И.Смирнов, М.Медикова, Марий Элын калык артистше-влак С.Строганова, А.Антонова, Марий Элын сулло артистше-влак С.Данилов, С.Сандакова, Э.Яковлев, А.Бусыгин да молат модыт.
С.БЕЛКОВА
