Марий Эл Радион хит-парадше
Йолташ-влак, тендан полшымо дене кодшо арняште мурызо-шамыч коклаштышт тыгайрак «тошкалтышым» чоҥеныт.
- Светлана Булатова – «Кунам эртен кайыш»
- Кристина Краснова – «Авай»
- Александр Марков – «Тылат, пагалымем»
- Богдан Тымбаршев-Шой – «Сеҥымашын мурыжо»
- Надежда Мокеева – «Окна яндам шупшале теле»
- Геннадий Куклин, Лидия Сапаева – «Ош лумын вальсше»
- Анита Феоктистова – «А тудо»
- Эльвира Трифонова, Анатолий Зарецких – «Тый каласе, йолташ»
- Алексей Милютин – «Йӧратем»
- Иван Смирнов – «Ах, шараҥге, ший парча»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Изинекак гармоньым шокта
Богдан Тымбаршев-Шой Йошкар-Олаште шочын, Национальный сымыктыш гимназийыште 4-ше классыште шинчымашым нӧлта, баяным шокташ тунемеш.
Рвезе изинекак гармоньлан шӱмаҥын.
– Икмыняр ий ончычак пелашем ялыште ужалыше деч гармоньым нылын. Очыни, шкенжын шокташ тунеммыже шуын, но тудлан кушташ утларак келшен. А икана тул тӱсан гармоньым изи Богдан ужын да паҥгалажым темдышташ тӧчен. Тудлан тунам кӱмыж-совла денат «оркестрым» шокташ келшен: йырже тӱрлӧ каструльым шындылын да совла дене перкален. Тиддеч вара сайрак семӱзгарым налынна. Тыге шке семынжак шокташ тунемын. Ныл ияшыж годым гармоньчо Александр Лопкин деке пел ий наре тунемаш кошто, – палдара Богданын аваже. – Кызыт тудо баян, гармонь да фортепиано дене кеч-могай семым шоктен мошта.
Богдан Тымбаршевын репертуарыштыже кок мурыжо уло, лишыл жапыште эше иктым ямдылаш шона. «Сеҥымашын мурыжо» мурылан мутым Алёна Яковлева возен, а семым Светлана Яндукова келыштарен.
Алевтина БАЙКОВА
Фотом еш альбом гыч налме
