Шернур районысо Марисола села гыч лекмаштак эше ик предприятий верланен – тиде Таникеевмыт ешын пилорамыже.
Тудым суртоза, Олег Геннадьевич, 2014 ийыште почын. А 2007 ий гыч транспорт услугым пуымо пашам шуктен – шкенжын КамАЗ дене мо кӱлешым йодмо почеш кондеден.
– Пилораме уло гынат, кызытат садак тиде пашам умбакыже шуем. Тӱҥ шотышто Казаньыш, Киров областьыш, икмыняр моло вере тыште, шкенан пилорамыште, ыштыме оҥам, пиломатериалым наҥгаен пуэм да мӧҥгешыже еҥ-шамычын йодмышт почеш кунамже кермычым, моло грузым кондем. А такшым гын утларакше клиент-шамыч мемнан деке шкешт толыт. Поснак – кеҥежым да тӱҥ шотышто посна еҥ-шамыч, частник-влак.
Оҥам ыштыме деч кодшо материалже гыч гын поддоным ыштат. Ойлымыж почеш, нуным Казань, Москва гыч клиент-шамыч шкешт толын налын наҥгаят. А кучылтшаш пушеҥгыжым Кужэҥер, Марий Турек районласе, тыгак Киров областьысе чодырала гыч кондат.
Икте-весыштын шонымашышт келшен толын
Пилорамым почаш шонымаш такше кузе шочын? Тидын нерген Олег Геннадьевич тыгерак ойлыш:
– Ончыч кожла дене пашам ыштыме – пушеҥгым монь шупшыктымо да шкенанат пилорамым почаш шонымашна шочын. Но тылеч вара, конешне, вигак почмо огыл, а чылажымат вискалыме, шонкалыме. Тургыжланымашат лийын. Молан манаш гын тылеч ончыч Чисолаште кевытым почынна ыле. Но тудо парышым конден огыл гаяк – мом ыштен налме гын, угыч тушкак веле кучылтмо. Сандене петыраш логале. А шонкален коштмо жапыште шочмо Урмыж ялем гыч ик палымем лачак тиде пилорамым налаш темлыш.
– Тугеже «На ловца и зверь бежит» манме семын лектын. Налше ден ужалышын шонымашда ик жапыште келшен толыныт, – палемдышым.
– Туге лектеш, – мане.
Лийыныт кокытын, ынде – кандаше
Тӱҥалтыште тыште кок еҥ тыршен: пилорамщик да тудын полышкалышыже. А кызыт кандашын улыт. Но нунын кокла гыч чыланжак тыште эре пашам огыт ыште. Пӧръеҥ-шамыч икте каят, весе толыт.
Туге гынат мемнан мийымына кечын пилорамыште паша шолеш веле ыле. Ик вере ик тӱшка пӧръеҥ-шамычын, вес вере весе-влакын пашам ыштыше
станокым сеҥаш тӧчен мутланымышт шоктыш. А паша кая гын, тугеже предприятийын сомылжо ворана. Тидыже, мутат уке, куандара.
Тыгак лийшаш: пашам шочшо шуйышаш
Кажне айдеме ончыкылык нерген шонен ила. Олег Геннадьевичат, мутлан, тидын дене гына серлагаш огеш шоно. Тудо оҥам ышташ эше ик рамым – ленточный манме пилорамым – налын, пашашке колтынеже. Кеч, ойлымыж почеш, оҥам ышташ келшыше пырняже ий гыч ийыш шагалемеш. Пушеҥге-шамыч шӱкшемыт да шӱкшемыт. Тиде мыняр-гынат нелылыкым луктын кертеш. Но айдеме эре сай ончыкылыклан ӱшана…
Кызыт пилорамыште Олег Геннадьевичын Станислав эргыжат пашам ышта.
– Стас ешыж дене тыштак, Марисолаштак, ила. А ме аваж дене Шернурышто пӧртым чоҥенна да кажне кечын тушеч тышке кудалыштам. Сандене тудлан йӧнанрак, – рашемдыш ача.
Тидым шотыш налынак вараже, илен-толын, тудо пилорамыжым пӱтынек эргыжлан кодаш шона. Такшым тыгак лийшаш: тӱҥалме пашам шочшак шуйышаш…
Любовь КАМАЛЕТДИНОВА
Авторын фотожо
