Марий Элыште тений шошым сонарлаш лийме пагыт 1апрель гыч 30 апрель марте шуйна. Тудын эртарыме шотышто Марий Элын Пӱртӱс поянлык, экологий да йырым-йырысе средам аралыме министерствын специалистше-влак, онлайн йӧнлан эҥертен, вияш эфир гоч умылтареныт.
Сонарлаш разрешенийым пуымо шотышто йодмаш дене министерствышкак лекман, районлаште гын, кугыжаныш инспектор-влак деке. Комбо ден узо лудым тений 1-30 апрельыште сонарлаш лиеш. А ийын коштшо да чодырасе моло кайыквусылан сонар 17 апрельыште гына почылтеш да 26 апрельыште петыралтеш. А теве сур комбым лӱйкалаш йӧршеш чарыме. Тений сонарлыме разрешенийым налаш 650 теҥге кугыжаныш пошлиным тӱлыман.
С.Носова