3 мартыште Оршанке районысо Тошто Крешын ялыште сонарзе биатлон дене республик кӱкшытан индешымше таҥасымаш эртен. тудым республикысе Сонарзе да пийым кучышо-влакын обществышт Марий Элын Пӱртӱс поянлык, экологий да йырым-йырысе средам аралыме министертсвыжын полшымыж дене эртарен.
Тушко Марий Эл гыч веле огыл, Угарман область, Татарстан да Чуваший гыч чылаже 21 команде толын. Участник-влакым саламлаш Марий Эл правительстве председательын икымше алмаштышыже Андрей Россошанский, Оршанке район администрацийын еҥже-влак миеныт ыле. Ончыч кӱлеш документым, ечым тергеныт, номерым пуэденыт да 10 шагатат пелылан старт лийын. Каласен кодыман, ятыр участникше ты танасымашке, ийготым ончыде, кажне ийын кумылын толыт, шкештат тале сонарзе улыт. Иктышт сузым сонарлаш йӧратат, весышт — нергым, маскалан коштшо-влакат уке огытыл. Кажныж дене мутланымеке, сонарлымышт нерген шуко оҥай историйым пален налаш лиеш.
Шукерте огыл Марий Эл Республикын сонарзын-влак гыч чумырымо команде Угарман кундемысе Дзержинск олаште эртыше регион кокласе турнирыште шке мастарлыкшым ончыктен. Мо шонеда, кумшо вер дене пӧртылын. А посна сонарзе коклаште гын Паранга районысо Осыял гыч Петр Герамсимов кокымшо верым сеҥен налын. Чынжымак, мемнан сонарзына-влак писе да туран лӱен моштышо улыт. Таклан огыл нуным Угарман йолташышт-влак эсогыл губернский тыгаяк таҥасымашке мияш ӱжыныт.
А Тошто Крешыныште эртыше таҥасымаште команде-влак коклаште икымше верыш Марий нефтеперегонный заводын пашаеҥже-влак лектыныт. Кокымшо да кумшо верым Советский ден Медведево районын сонарзыже-влак сеҥен налыныт. Эн туран лӱйкалыше семын Марий Турек районын командыж гыч Олег Попов да эн писе семын Марий нефтеперегоннный заводын командыж гыч Александр Иванов ойыртемалтыныт.
Тыгак эн самырык да эн илалше сонарзымат палемденыт: Леонид Черновлан 21 ий веле, а Иван Москвинлан вашке 70 ий темеш. Кокымышыжо тиде таҥасымашке кажне ийын толеш. Ойыртемалтше-влаклан кучыктымо полек-влакат куандарышт.
Мероприятийыш толшо моло уна-влакат шкеныштым сонарзе семын шижын да терген ончен кертыныт. Нунылан лӱмын посна VIP забег лийын. Таҥасымашын кӱчыкемдыме дистанцийжым эртеныт да эше снегоступым (кӱчык да лопка ече) чиен куржталыштын кертыныт. Тыгай кумылан-влак коклаште республикын пӱртӱс поянлык, экологий да йырым-йырысе средам аралыме министр Владимир Шутов, тудын алмаштышыже-влак Николай Шурков, Елена Смолина, Татьяна Иванова, Оршанке муниципальный район администрацийым вуйлатыше Александр Плотинков, республикысе Сонарзе да пийым кучышо-влакын обществыштым вуйлатыше Григорий Тихонов да молат лийыныт.
С.Носова.
И.Головёнкинан фотожо.
