УВЕР ЙОГЫН

Александр Евстифеев Йошкар-Оласе йолчием фабрикыш миен

Марий Эл вуйлатыше Александр Евстифеев Йошкар-Оласе йолчием фабрикыш миен. Тушто производство, тусо паша условий да шукерте огыл налме у оборудованийын йӧнжӧ-влак дене палыме лийын, палдара Марий Эл Республик вуйлатышын мер кыл да увер управленийже. 

Тиде преприятий 1946 ий годсек пашам ышта. Пытартыш 15 ий жапыште «Фирма «Техноавиа» компанийын составышкыже пура. Фабрикыште кызыт 700 еҥ пашам ышта.

Александр Евстифеев предприятийын икмыняр участкыж ден  комплексшым ончен савырнен. Фабрикыште автоматизироватлыме станок-влак улыт, но шуко паша эше кид дене ышталтеш. Тидлан вуйлатыше поснак кугу тӱткышым ойырен.

Йошкар-Оласе йолчием фабрикын генеральный директоржо Сергей Каморкинын палдарымыж почеш, тыште промышленностьын, транспортын да агропромышленный комплексын отрасльыштын специалистышт-влаклан паша йолчиемым ыштат. Чылаже 110 тӱрлӧ модельым ямдылат. Марий Эл вуйлатышылан производствым вияҥдышаш план да улшо нелылыкышт нерген каласкаленыт.

— Сай гыч тӱҥалына: паша икшырымын шукталтеш. Пашадар кугужак огыл, но жапыштыже тӱлат. Туге гынат тудым кугемдаш кӱлеш. Кадр дене кылдалтше йодышым рашемден шуктыман. Сырьем налме шотышто чолгарак лийман. Уке гын кызыт тудым шергынрак налыт. Производствын шке акшым  иземдыме нерген шоналтыман, — журналист-влаклан пуымо интервьюштыжо палемден А.Евстифеев.

Генеральный директорын мутшо почеш, предприятий ден холдинг производственный базым кумдаҥдышаш верч тыршат. Эн ончычак тиде – у  корпусым ыштымаш. Тушто сатун шке акше логистикым иземдыме дене да  энергийым аныклыше оборудованийым вераҥдымылан, икмыняр молылан кӧра шулдештшаш.

Тыште ончыкылык уло да тудо сай улмым производствын кугытшо кушмат пенгыдемда. Йошкар-Оласе фабрике ӱмаште 970 тӱжем мужыр йолчиемым ыштен луктын. А тений 1 млн.200 тӱжем мужыр кем ден ботинкым ямдылаш палемден.

Л.Камалетдинова.

Опубликовать в Одноклассники

Добавить комментарий