24 майыште регион вуйлатышын обязанностьшым жаплан шуктышо Александр Евстифеев Марий Эл Республикын правительстве председательжын икымше алмаштышыжлан, Марий Эл Республикым вуйлатышын администрацийжым вуйлатышылан Сергей Сметаниным шогалтен.
Журналист-влаклан интервьюм пуымыж годым регионым вуйлатыше кадр решенийым тыге умылтарен:
– Таче ойлымем лукмо пунчал дене негызлалтын, тудлан келшышын, Марий Эл правительствыште правительстве председательын икымше алмаштышыжым, Марий Эл Республик вуйлатышын администраций вуйлатышыжым шогалтыме. Тиде квалифицироватлыме юрист, правительстве аппаратын пашаж дене сайын палыме. Сай организатор, исполнитель, пашам чот йӧратыше айдеме. Тиде должность кужу жап яра ыле, мыйын шонымаште, палемдыме кандидатур республикысе фактический положенийланат, пашам шуктымо обязанностьланат келшен толеш.
Сергей Алексеевич Юл кундемысе федеральный округышто Россий Федераций Президентын полномочный представительжын аппаратыштыже пашам ыштен, вара Россий Федераций Федеральный Погынын Федераций Советшын Правовой да судебный йодыш шотышто комитетын аппаратшым вуйлатен, Индешымше арбитражный апелляционный суд председательын алмаштышыже, Москва областьысе Арбитражный суд председательын алмаштышыже лийын.
М.ИВАНОВА.
