Рушарнян, 24 ноябрьыште, Российыште Аван кечыже палемдалтын.
Республикыштына тудлан пӧлеклалтше пайрем шуматкечын рӱдоласе Сеҥымашын ХХХ идалыкше лӱмеш тӱвыра полатыште эртыш.
Аван кечыжлан пӧлеклалтше мероприятий-влак эн ончычак районлаште лийыныт. Туштак кум тӱрлӧ номинацийыште ойыртемалтше ава-влакым ойырен налыныт – тиде:
— вич да шукырак икшывым ыштыше, нуным чыла шотыштат шотаным ончен куштышо-влак;
— Россий Федерацийын достойный гражданже-влакым, нунын коклаштак шке воинский (интернациональный) порысыштым шуктышо воин-шамычым, социальный сферыште сулло деятель-влакым ончен куштышо да воспитатлыше, кучем орган-влакын палемдыме ава-шамыч;
— еш политике йодыш дене кылдалтше мер пашам шуктышо чолга ава-влак.
Лач нине ӱдырамаш-влакымак тиде торжественный мероприятийыш пагален ӱжыныт ыле.
Тыгак тылеч ончычак республикысе чыла районышто «Мыйын авам» сӱрет ден фотографий конкурс эртен. Тушто эн сайлан шотлымо паша-влакым ойырен налыныт да тиде пайремыш конденыт. Тыге 7 гыч 16 ияш марте ӱдыр-рвезе-шамычын пашаштым выставкыш чумыреныт да нуным ты мероприятийыш толшо кажне еҥ ужын, аклен кертын. А икшыве-шамыч тушто аваштым кузе-гына ончыктен огытыл?! Кажныжын чотак сайын сӱретлаш, эн ойыртемалтше фотографийым ышташ тыршымыже шижалтын. Арам огыл тӱвыра полатын фойештыже ава-влак нуным кужу жап «шымлышт».
Фойештак ӱдырамаш-влакым «Сударушка» ансамбль сылне мурылаж дене куандарыш.
Тылеч вара торжественный ужаш тӱҥале. Пайремыш ӱжмӧ ава-влакым эн ончычак Марий Эл вуйлатыше Александр Евстифеевын лӱмжӧ дене республикысе правительстве председательын алмаштышыже Илга Дравниеце саламлыш. Умбакыже «Союз женщин России» ушемын региональный отделенийжын председательже Нина Иванова саламлыме мутым ойлыш, икмыняр авалан ты ушемын медальжым кучыктыш. Марий Элын социальный вияҥмаш министрын сомылжым шуктышо Андрей Компаниец, образований да науко министрын алмаштышыже Анжела Сагадуллина икмыняр авалан министерстве-влакын тауштымашыштым кчыктышт. Спорт, туризм да молодежный политике министрын алмаштышыже Станислав Игошин гын тидым ыштымыж деч ончыч шкенжын возымо мыскара сынан изирак почеламутшым лудын пуыш, вет тудо – кум шочшан ача. Тӱвыра, савыктыш да калык паша шотышто министрын алмаштышыже Галина Ширяева погынышо ава-влакым марла да рушла саламлыш, вара ойыртемалтше южо авам министерствын тауштымашыж дене палемдыш.
Илыш – корнан-корнан. Пиалан татшат, ойган жапшат шагал огыл лиеда. Тидын семынак пайремыштат шинчавӱдым лукшо ужашат ыле. Мероприятийыште служебный порысым шуктымышт годым ӱмыр лугыч лийше эрге-влакын аваштлан «Дочери Отечества» медальым кучыктышт. Сценыш Советский район гыч Валентина Феклисовна Волковам ӱжыч. Тудын кугурак Василий эргыже Чечняште 2015 ийыште вуйжым пыштен, «За мужество» орден дене палемдалтын.
Раисия Михайловна Полатова — Параньга район гыч. Олег эргыже Чечняште лийын, но ончылий Сирийыште ош тӱня дене чеверласен.
Йошкар-Ола гыч Елизавета Ивановна Шаблатован Владимир эргыжын илышыже 2000-ше ийыште кумдан чапланыше «Курск» атомный вӱдйымал субмариныште кӱрылтын.
Морко район гыч Нина Леонидовна Тихонован Алексей эргыжат 19 ий ончычак Чечняште колен. Но жап шагал огыл эртен гынат, аван чонжо алят лыпланен огыл, коеш. Тудо эше пайрем тӱҥалме деч ончычак фойеште шинчавӱдшым йыштак ӱштын шинчыш, сценыштат пӧлекым налмыж годым кумылжо чотак тодылто…
Пайремыште нине ава-влаклан тӱрлӧ награде ден пӧлекым кучыктымо коклаште нунын лӱмеш республикысе ола ден районла гыч усталык коллектив-шамыч, посна еҥ-влакат сӧрал мурыштым йоҥгалтарышт, сылнын кушталтышт. Тыге погынышо-влакын чонышкышт рушарнян лийшаш пайремыштлан нӧлтшӧ кумылым шуматкечынак «пӧлеклен» колташ тыршышт.
Любовь КАМАЛЕТДИНОВА
Фотом Марий Элын Социальный
вияҥмаш министерствыж гыч налме
