24 ноябрьыште Национальный президент школышто Аван кечыжлан пӧлеклалтше «Авам дене пырля» конкурс лиеш.
Тудым республикысе «Саскавий» марий ӱдырамаш мер ушем ден республикын Тӱвыра, печать да калык-влакын пашашт шотышто министерствыжын полшымышт дене эртара.
Конкурсыш ава (37 ияш марте) шке икшывыж (10 ияш марте) дене ушнен кертеш.
Тӱҥалтыште йоча шке аваж нерген (кум минут деч шуко огыл) каласкалышаш. А кокымшо этапыште тудо аваж дене пырля «Пырля сӱретлена», «Пырля ямдылена», «Мемнан ОБЖ» конкурслаште мастарлыкым ончыкта. Тиддеч вара нуно марий вургем дене сценыште коштын эртат.
Мӧҥгысӧ паша семын нуно усталыкым палдарыше номерым ямдылышаш да «Объективыште — авам» фотовыставкыш ушнышаш улыт.
Конкурсыш йодмашым 20 ноябрь марте Республикын марий тӱвыра рӱдерышкыже тыгай адрес дене колтыман: mari-centr@mail.ru.
А.Байкова.
