ЕШ ДА ИКШЫВЕ ЛӰМГЕЧЕ МЕР ИЛЫШ ДА ЙӰЛА ПАТЫРЛЫК СОЦИАЛ ИЛЫШ

Ӱдырамаш да ешлан пӧлеклалтше пайрем

6 мартыште Морко районышто ӱдырамаш-влакын VIII форумышт эртен.

Еш идалыклан да районын 100 ияш лӱмгечыжлан пӧлеклалтше мероприятийым «Чылажат еш гыч тӱҥалеш» манын лӱмденыт.

Йӱла почеш утларакше ялла гыч тӱрлӧ аланыште пашам ыштыше чолга ӱдырамаш ден шуко шочшан ава-влакым, спецоперацийыште лийше да тушто вуйым пыштыше патырна-влакын авашт ден пелашыштым ик верыш чумыреныт.

Форумышто нунылан икте-весышт дене еш илыш да тудым ворандарен колтымаште вашлиялтше нелылык, тӱрлӧ ситуаций гыч лектын моштымо нерген чон почын мутланаш йӧн лийын.

Пайрем дене нуным район администраций вуйлатыше Александр Голубков, Марий Эл Кугыжаныш Погын председательын алмаштышыже Лариса Яковлева, депутат Наталья Пушкина, Морко районын кураторжо, спорт да туризм министр Лидия Батюкова да молат саламленыт, мер илышыште чолгалыкым ончыктымыштлан тауштеныт.

Вашлиймаште ты гана начартазалыкан ешыш ашнаш налме икшывым воспитатлыме шотышто мутланымашлан кугу тӱткышым ойырымо.  Ашнаш налше еш-влакын  районысо «Памаш» клубыштын председательже Маргарита Гаврилова пашашт дене палдарен да шкеныштын кок икшывышт лиймеке, эше вич йочам ончаш налмышт нерген каласкален, – палдара форумын организаторжо, район администраций вуйлатышын алмаштышыже Ирина Королева. – Шуко шочшан ава Эльвира Шарифулловна Емельянован ДЦП диагнозан икшывым ончен-куштымо, ойго ончылан вуйым сакыде ончыко кайымыж нерген каласкалымыжат чоным тарватен. Педагог, шке жапыштыже Октябрьский школын завучшылан тыршыше Альфия Анваровна Гатауллинан вич йочан  ешыж нерген чон почын ойлымыжо шинчавӱдымат луктын. Нунын кум эргыштат военный корным ойырен налыныт, иктыже спецоперацийыште вуйым пыштен.

Йошкар-Олаште Морко вел ушемын председательже Валерий Андреев ден М.Шкетан лӱмеш Марий национальный драме театрын тӱҥ режиссёржо Роман Алексеев ушем лӱм дене спецоперацийыште лийше да тушто вуйыштым пыштыше патырна-влакын авашт ден пелашыштлан порсын шовычым пӧлеклышт. Кажныжлан тазалыкым да ончыко волгыдо ӱшан дене илаш тыланышт.

Зинаида Порфирьевна Токташеван еш йӱлам арален кодымо нерген каласкалымыжым куанен колыштна, Алевтина, Эльвира ӱдыржӧ да Юлия уныкаж дене пырля муралтен колтымыштым йӧратен ончышна, – ешарыш Ирина Филипповна.

Районысо ӱдырамаш-влак ушемын председательже Наталия Семенова Еш добровольчествын пашаж дене палдарен.

Форумыш мийыше-влаклан школын фойештыже эртаралтше мастер-класслаште

кечывал макияжым ышташ, маскироватлыше сеткым пидаш, парафин йӧн дене кидым моторештараш, пайрем ӱстел чесым сервироватлаш, калык ончылно выступатлыме деч ончыч йӱкым шындаш тунемаш, уста кидмастар-влакын пашаштым ончаш да чонлан келшышыжым пӧлеклан налаш, тыгак чолга ӱдырамашын тутло мелнаж дене шудо чайжым тамлен ончаш йӧн лийын.

«Чылажат еш гыч тӱҥалеш» фотовыставкат еш-влакын йӱлаштым почын пуэныт.

Кумылан-влак Морко рӱдӧ эмлымверын дерматологшо дек приёмыш пурен,  шочмо пале, шыгыле нерген пален налын кертыныт, – каласкала И.Королева. –Тиде специалистым форумыш кок ий почела ӱжына, садлан рӱдӧ эмлымверын тӱҥ врачше Наталия Евгеньевна Антюшиналан кугу таум каласем.

Пайрем кумылым нӧлташ Марий Эл Кугыжаныш премийын лауреатше, мурызо Александр Речкинын сылне мурыжо-влак полшеныт.

Форум районысо ӱдырамаш-влаклан вашлияш, икте-весышт дене еш илыш да тудым ворандарен колтымаште вашлиялтше нелылык, тӱрлӧ ситуаций гыч лектын моштымо нерген чон почын мутланаш, жапын йодмыж почеш ойгыш логалше ава, пелаш-влаклан кеч ик жаплан пайрем кумылым шижаш йӧным пуэн.

А.БАЙКОВА

А.Вольскаян фотожо

 

Опубликовать в Одноклассники

Добавить комментарий