МЕР ИЛЫШ ДА ЙӰЛА

Российын кечыжым — ик еш семын

12 июньышто ме Российын кечыжым палемдена. Элыштына ик эн  йӧратыме да самырык пайрем. Тудо Россий кугыжанышын вий-куатшым, чапшым, кумда кӱкшӧ  национальный идейжым,  тудын йыр калык-влакын чумыргымыштым ончыкта. Российыште 190 утла тӱрлӧ калык ила. Нунын коклаште марий калыкат шке вержым сулен.

Теве ты фотошто Татарстан Республикысе Кукмарий район гыч «Кна вел» ансамбль. Артист-влак Менделеевский район Элнет ялыште эртыше «Семык» общероссийский фестивальыш миеныт. Нуно вес ийысе фестивальын озаже улыт.

Татарстаныште Семык колымшо гана эртен. Пайремыште Удмуртий, Башкортостан Республикла, Киров область да Татарстанысе икмыняр район гыч делегаций-шамыч миеныт. Чылаже 36 коллектив усталыкшым ончыктен. Марий Эл гыч Волжский районысо «Шырча» калык фольклор ансамбль , И.Палантай лӱмеш тӱвыра да сымыктыш колледжын коллективше, Курыкмарий район гыч «Шыжарвлӓ»  кӱслезе ансамбль куандареныт.

3 июнь. Уна-влакым Семыкын тенийсе озаже, Элнет ял калык, вашлийын. Нунын коклаште — Татьяна Семякова ден изи Джастина. Шокшо, тутло  кинде, шоҥешталтше пура. Уна-шамыч изирак кӱвар гоч эртат. А тудын пылдырыштыже марий солык-влак кечат.

Пайрем делегаций-влакын майдан дене эртымышт гыч тӱҥалын. Тиде гана парад  ойыртемалтше лийын. Чыланат, кидым вашла кучен, кугу йырым ыштеныт. А варажым Татарстанысе тӱҥ онаеҥ Олег Третьяков юмым пелештен.

Фестивальыш чумыргышо-шамычым Менделеевский район администраций вуйлатыше Валерий Чершинцев, Марий Элын тӱвыра, печать да калык-влакын пашашт шотышто министржын алмаштышыже Галина Ширяева, Оньыжа Эдуард Александров, Татарстанысе марий-влакын НКА-н председательже Олег Третьяков, Татарстан Республикысе Калык-влак ассамблейын исполнительный комитетшым вуйлатыше Николай Владимиров саламленыт.

Официальный ужаш деч вара площадкылаште уна ден пайремын озаже, йоча коллектив-влак концерт программым ончыктеныт. Ялысе кудышто марий йӱла дене лишкырак палыме лияш, калык модышышто, спорт таҥасымаште вийым тергаш йӧн лийын.

Палемден кодымо шуэш, пайрем марий тӱсым утларак налын. Тений татар Сабантуйлан келшыше атрибут койын огыл: мутлан, кемым сакалыме варам шогалтен огытыл. Пайрем  аланымат марий шӱлыш дене сӧрастараш тыршыме койын. Тидыжым Элнет кундемын чолга еҥже Геннадий Мальгин ыштен. Тудо «Семык» возыман тӱҥ капкашке тӱрым шкак пӱчкеден. Геннадий Александровичын темлымыж почешак ик але вес кундемыш мыняр километр улмым  ончыктышо указательым вераҥденыт. Тыге мый Элнет гыч Йошкар-Ола марте 398 километр лиймым пален нальым. Лачак Киргизий гыч акробат-влакын номерышт гына марий сын деч мыняр-гынат ойырен.

А ик площадкыште поснак  «шокшо» ыле. Кумылан-влак «Марий ӱдыр» ден «Марий патыр» конкурслаште таҥасеныт. Татарстанын тӱрлӧ районжо гыч лийше ӱдыр-шамычлан ончаш толшо-влак совым шокшын ик гана веле огыл кыреныт. Тыге «Чевер марий ӱдыр – Семык-2017»  номинацийыште Казань гыч Анна Таныгина сеҥен.  А Набережный Челны ола гыч Валентин Кузнецов марий калык кучедалмаште «Марий патыр» лӱм дене  палемдалтын. Когыньыштланат «Ижминводы» санаторийыште канаш путёвкым кучыктеныт.

Тений пайрем ала-кузе писын мучашлалтын. Саламлымаш. Флагым ӱлык волтымаш да тудым вес озалан кучыктымаш.  Вес ийын Семык Татарстанысе Кукмарий районышто эрта.

Денис РЕЧКИН.

Менделеевский район  Элнет ял.

Авторын фотожо.

Снимкыште: Татарстанысе Кукмарий район «Кна вел» ансамбль.

Опубликовать в Одноклассники

Добавить комментарий