УВЕР ЙОГЫН

Ӱшанен ила…

Кодшо кугарнян Марий самырык театрыште пошкырт марий ӱдыр Алевтина Баязитован «Ӱшанен илем» у книгажын презентацийже эртыш.

Марий Эл Писатель ушем полшымо дене тудын нылымше книгаже ош тӱням ужын. Автор илыш, пӱрымаш, шочмо-кушмо мланде, ава, йӧратымаш нерген чон вургыж воза. Тыгак у книгашке пурышо тӱрлӧ темылан пӧлеклалтше муро-влак посна ужашым айлат. Каласен кодыман, Алевтинан почеламутшо-влак кокла гыч шукыжо мурыш савырненыт. Эсогыл Сергей Маков, Юрий Евдокимов -Тойварс гай лӱмлӧ композитор-влакат семым пыштеныт. Мутат уке, утларакшым самодеятельный композитор-влак возат. Пытартыш ийлаште гын тыгай мурыжо ятырак шочын. Презентаций годым  икмыняржым колышташ йӧн лийын. Эльвира Попова, Надежда Пашкина, «Вената» дуэт, Галина Якушева, Любовь Орлова да молат йоҥгалтарышт. Озаҥ гыч лӱмын композитор да продюссер Жаудат Гильманов Алевтинам саламлаш толын ыле. Творческий вашкылышт шукертак ышталтын, пырля ямдылыме мурышт поснак ойыртемалтшын йоҥгат.

Алевтина шкежат мура.  Тугакше тудо Калтаса районысо Амчемучаш   ялыште ила. Шке жапыштыже Йошкар-Оласе культпросветучилищым тунем лектын. Вара кужу жап шочмо ялысе клубышто пашам ыштен. Кызытат туштак ила да Нефтекамск олаште марий кас-влакым вӱда. Нылымше книгажын презентацийжым Йошкар-Олаште эртараш пырля йолташыже-влакымат конден ыле. Тиде — марий йылмым туныктышыжо Мария Ивановна Шайдулина, шӱжарже Лилия Матвеева да тудын Володя пелашыже.

Касыште Алевтина у книгаж гыч почеламут-влакым лудын пуыш, икмыняр у мурым йоҥгалтарыш. Сценыш лекше кажне унажлан почеламут книгажым пӧлеклыш. А Пошкырт кундем гыч толшо-марий-влак погынат гын, кузе кандырам пунен куштымаш деч посна серлагат. Алевтинам саламлаш толшо-шамычат пырля мурен куштышт.

 С.НОСОВА.

 Авторын фотожо.

Опубликовать в Одноклассники

Добавить комментарий