УВЕР ЙОГЫН

Юрист умылтара

Окса дене налын кертам мо?

Кажне ийын канаш ойыралтше отпускыш ом кай гын, окса компенсацийым налын кертам мо?

Е.Колесов.

Йошкар-Ола

Йодышлан Медведево районысо прокурорын алмаштышыже  Роман Голиков вашештен:

 — РФ Паша кодексын 126-шо статьяж дене келшышын, кажне ийын ойыралтше отпускын ужашыжым, 28 кече деч утыжым, пашаеҥын возен пуымо йодмашыж почеш, окса компенсаций дене вашталтен кертыт.

Кажне ийын ойыралтше отпускым ушымо годым але ик ий гыч весыш кусарыме годым кажне отпускшын ужашыжым, 28 кече деч утыжым, тыгак окса компенсаций дене але ты ужашыж гыч кеч-мыняр кечыжым вашталташ лиеш.

Кажне ийын канаш ойыралтше отпускым, тыгак ешартыш тӱлыман отпускым мӱшкыран ӱдырамаш-влаклан, тыгак 18 ий деч изирак ийготан пашаеҥ-влаклан окса компенсаций дене вашталташ огеш лий. Тыгак кажне ийын ойыралтше ешартыш тӱлыман отпускым аяр але лӱдыкшӧ условийыште пашам ыштыше-влаклан окса компенсаций дене огыт вашталте. Паша гыч кайыме годым веле кучылтдымо отпуск жаплан гына окса компенсацийым пуат.

Мут кучаш логалеш

Пенсийыш шушашлык айдемым пашаш налаш отказат гын, тыгай вуйлатышым мут кучаш шогалташ лиеш манын колынам. Тыгак мо?

 П.Молчанова

 Йошкар-Ола.

 Йодышлан Медведево районысо прокурорын полышкалышыже О.Лесовщикова вашештен:

– РФ Уголовный кодексын 144-ше статьяже почеш, пенсийыш шушашлык айдемым вуйлатыше пашаш огеш нал але тидле амал денак паша гыч луктын колта гын, тудлан мут кучаш логалеш.  Мо тудым вуча: 200 тӱжем теҥге марте, але латкандаш тылзе марте судитлыме еҥын налме пашадарже але моло парышыже кугыташ штраф, але 360 шагатлан виеш пашам ышташ колтат.

Тидын годым пенсийыш шушашлык пагытшылан  РФ-се пенсионный  законодательстве дене келшышын ийгот ешаралтмылан кӧра страховой пенсийым палемдыме деч ончычсо вич ийым шотлат.

С.Носова ямдылен.

Опубликовать в Одноклассники

Добавить комментарий