Самырык шахматист М.Волков тӱнямбал первенствыште кумшо верыш лектын. Максим Испанийыште 8-12 ияш-ӱдыр-рвезе-влак коклаште уш-акылжым терген, мастарлыкшым ончыктен.
Рвезе Йошкар-Олаште классический пӧръеҥ-влак коклаште шахмат дене республикын чемпионатыштыже вийжым терген. Тушто 10 ияш Максим Волков Марий Элын эн самырык чемпионжо лийын. Тыгайже республикнан историйыштыже икымше гана палемдалтын.
Самырык шахматист ФИДЭ тӱнямбал кубокым сеҥен налше, Российын спорт мастерже Сергей Карякин дене модын. Тудыжо Йошкар-Олаште шахмат дене Россий кубокын ик этапшын нылымше турниржым почын. Медведевысе спортшколын тунемшыже Волков дене вич минуташ блиц-турнирым эртарен. Рвезе туштат шкенжым сай велым гына ончыктен.
Декабрь мучаште Максим Москошто лӱмлӧ тренер Марк Дворецкийым шарныме лӱмеш шахмат дене писын модмаште кумшо верым налын. Тушко тӱнямбал, Европа, Россий первенствын призёржо ден сеҥышыже-влак участвоватленыт.
Е.ЭШКИНИНА
