СПОРТ

Тренерже … кочаже да чӱчӱжӧ-шамыч улыт

Тиде рубрик дене лекше материал-влак коклаште Артём Коровин нерген савыктыш лийшашак, шонена. Вет тудын нерген «Кугешнена!» манын кычкыралтыш денак каласаш келшен толеш. Молан? Артем байдарке да каноэ дене гребле дене заниматла да 16 ияшак Российын спорт мастерже лийын. Адакшым тудо моткочак ойыртемалтше еш гыч. Ынде чыла тидын нерген радамлын каласкалена.

Артем Волжск олаште шочын да тений 30 августышто 19 ийым веле тема гынат, тӱрлӧ кӱкшытан таҥасымашлаште ятыр гана сай результатым ончыктен. А сай результат – тиде шканже гына огыл чап, пӱтынь Марий Элым чапландарымаш!

Рвезе — «Олимпийский резерв училищын» студентше. Тыгодымак тудо эше «Спортподготовко рӱдерын» спортсмен-инструкторжо. Тидын дене пырля  «Олимпийский резерв комплексный спортивный школышто» спортподготовкым эрта.

Артем дене 3 личный тренерже пашам ыштат. Мо оҥайже, тиде – кочаже, аважын ачаже, Евгений Борисович, да аважын кок шольыжо, Владислав Евгеньевич ден Александр Евгеньевич Мещеряковмыт, улыт.

Чылажат кочаж дечын тӱҥалын. Тудо Мордовийыште шочын. Луымшо класс деч вара Узбекистаныш тунемаш каен. Ешыжат шкетшым коден огыл да чыланат ты элыш илаш кусненыт. Туштак эше самырык рвезе байдарке да каноэ дене гребльылан шӱмаҥын. Тиде вид дене тудо спорт мастерыш кандидат марте шуын.

1991 ийыште Евгений Борисовичым мемнан республикыш, Волжск олашке, ты вид дене тренерлан пашам ышташ колтеныт. Ала-кунамсе семын ынде тудо тышке уло ешыж дене илаш куснен. Ӱдыржӧ, Оксана, Артемын аваже, гына медсестра профессийым ойырен налын. А молышт, кок эргыже, тевыс, ачаштым ончен, тудын корныжым тошкат.

— Мемнан вес семынже лийынат кертын огыл. Ик корно гына палемдалтын – байдарке да каноэ дене гребле дене изи годымак заниматлаш тӱҥалаш, вара ачана семынак тренер лияш. Санденак тиде пашам мый 11 ий шуктем, изам – 16 ий, — телефон дене мутланымына годым палдарыш Александр Евгеньевич.

— Лишыл родо дене пашам ышташ куштылго але, мӧҥгешла, нелырак? Акада тендам эргыжым кеч изишак чаманаш йодын огыл? – йодышым пуышым.

— Кеч-могай ава шке йочажым чамана. Тудат ончычшо тыге ала ойленат – ом шарне. Артемын тукым шольо улмыжлан кӧрак тудын дене пашам ышташ нелырак. Мо шотышто? Тренировкышто кугу нагрузко пуалтеш. Ме палена: тиде неле, санденак чаманыме кумыл лектеш. Но, вес велым, чаманен, моло дене таҥастарымаште, изирак нагрузкым пуэн, тудо ончыко огеш кай. Тыге тудлан удам веле ыштена. Сандене ме нагрузкым келшышын, мыняр кӱлеш, тунарым, пуэна. Да тидак сай результатыш шуктен. Ынде акана мыланна таум гына ышта. Мемнан тандемна — тунемше, ача-ава да тренер-влак – моткоч сай. Ме келшен пашам ыштена да Артемат куандара гына.

Рвезын тренерже, тукым изаже, Артемын теве могай кугурак сеҥымашыже-влакым палемден кодыш:  2017 ийыште тудо Саратов обласьысе Энгельс олаште эртыше Российын первенствыштыже да Всероссийский таҥасымашлаште 19 ияш марте ийготан-шамыч коклаште призер да сеҥыше лийын; 2018 ийыште Москваште эртыше Российын первенствыштыже вич гана сеҥышыш лектын; ты ийынак Италийыште лийше Европын первенствыштыже ший медальым сеҥен налын. Ӱмаштак Болгарийыште Тӱнямбалсе первенствыште той медаль дене палемдалтын. Тений майыште Краснодарыште Российын первенствыже лийын. Тушто 24 ияш марте ийготан-шамыч коклаште кумшо верыш лектын. Рвезе теве могай сеҥымашыш шуын!

— Ты вид дене Российысе спортсмен-влак коклаште рейтинг эртаралтеш. Тушто ӱмаште Артем икымше верыште лийын. Россий сборный командын тренерже-шамыч Артемлан ончыкыжым кугу ӱшаным ыштат. Меат 2024 ийыште эртышаш Олимпийский модмашке Артем логалеш да Марий Элын чапшым кугу кӱкшытыштӧ арала манын ӱшанена, — каласыш тренерже Александр Мещеряков.

Кеҥеж дене пайдаланен, Артем кызыт кана, шонышна. Уке улмаш. Тудо Российын первенствыжлан ямдылалтеш.

— Сентябрьыште иктаж кок арня наре каналта, а вара угыч тренировко-влак лийыт. Тылеч шуко жап канаш огеш лий – организмлан пайдале огыл. А кызыт тренировко-влак эртат, — мане тукым изаже, тренерже.

— Тренировкыш арнялан 10 гана: вич кече – кечеш кок гана, кок кече ик гана гыч коштам. Лишыл жапыште, 13 гыч 18 август марте, Казаньыште Российын первенствыже лиеш, сандене тудлан ямдылалтам, — каласыш спортсмен.

— Эн кугу шонымашет могай? – йодмылан, рвезе тыге вашештыш:

—  Чыла спортсменын эн кугу шонымашыже икте – Олимпийский модмашке логалаш. Мыят вес, 2020-шо, ийыште лийшашышкыже огыл гын, 2024 ийыште эртышашышкыже логалашак тыршынем.

Тугеже рвезын шонымашыже тек шукталтеш! Тек Марий Эл гыч Артем Коровинын лӱмжӧ тӱня мучко чаплана!

Любовь Камалетдинова

Фотом еш альбом гыч налме. 

 

Опубликовать в Одноклассники

Добавить комментарий