ТАЗАЛЫК

Эмым яра пуэдаш тӱҥалме

 
Марий Элым вуйлатыше Александр Евстифеевын медицине полышым амбулаторий условийыште налше коронавирусан пациент-влакым эмлаш республикын бюджетже гыч 1 млн. теҥгем ойырымыжо да препаратым жапым шуйкалыде налаш, черле-шамычлан пуэдаш тӱҥалаш каласымыж нерген возенна ыле. Регионын Тазалыкым аралыме министерствыжын 17 ноябрьыште увертарымыж почеш, тиде окса дене «Ингавирин» препаратым налме.
РФ правительствын распоряженийже дене келшышын, Марий Элын Минздравшылан у коронавирус инфекций дене черланыше амбулаторный пациент-шамычлан эмым ситараш 25,5 млн. утла теҥгем ойырымо. 2020 ий мучаш марте эмым COVID-19 деч мӧҥгыштӧ эмлалтше 3246 пациент налшаш.
Эм лабораторно да клинически (рентген снимке, ойыртемалтше пале, черын койышыжо негызеш) пеҥгыдемдыме диагнозан черле-влаклан чылт яра ойыралтеш.
Доктор приёмыш толшо пациентлан диагнозым шында да эмым пуа. Але черле врачым мӧҥгышкыжӧ ӱжыкта, да эмым тудлан участкысе службын медпашаеҥже але волонтёр-медик конден пуат.
Тидымат шотыш налман: препарат эмлалтме чумыр курслан огыл, а икмыняр кечылан гына ойыралтеш, молан манаш гын поснак вирусым пытарыше средстве тазалыклан кугу зияным ыштен кертеш. Тудым черын койышыжым да шкем шижмым эскерен йӱаш кӱлеш. Кокымшо гана вашлийме годым врач пациентын тазалыкшым акла да эмлалтме курсым шуйымо але чарыме нерген пунчалым луктеш.
Медик-влак черлын тазалыкшым телефон полшымо денат контролироватлен кертыт: кажне поликлиникыште колл-рӱдер ден «шокшо линий» пашам ыштат. Мӧҥгыштӧ эмлалтше пациент, нунылан йыҥгыртен, тазалыкыштыже палдырныше вашталтыш-влак нерген каласкален, курсым шуяш але чараш, але весемдаш кӱлмӧ нерген ойлен кертеш.
Тӱҥалтыште COVID-19 ден ОРВИ койышышт дене икгайрак улыт, но врач-влак у коронавирус инфекцийым рашемдаш тунем шуыныт, сандене яра эмым лачшымак тыгай черле-влаклан палемдат.
— Яра эмым стационар гыч мӧҥгышкӧ мучаш марте эмлалташ колтымо пациент-влакат налын кертыт, — рашемда тазалыкым аралыме министрын алмаштышыже Татьяна Королева. – Нине пациент федеральный регистрыште улыт, стационарыште паремаш тӱҥалыныт, медицине велым сутка мучко эскералтдеат кертыт, сандене больнице гыч амбулаторий условийыш кусаралтыт. Тыгай годым пациентын тазалыкше да эмлалтме йӧнжӧ дене кылдалтше чыла увер илыме кумдыкысо поликлиникышке колталтеш. Умбакыже тудым поликлиникын специалистше-шамыч эскерат да эмлат. Процессым писемдаш манын, стационар гыч амбулаторий условийыш эмлалташ кусарыме пациент поликлиникым тидын нерген шкеат палдарен да медицине велым эскераш, тыгак яра эмым ойыраш кӱлмӧ нерген увертарен кертеш.
Амбулаторный черле-влаклан палемдалтше эмым кодшо арнян налаш тӱҥалме. Эртыше шочмын тудым у коронавирус инфекциян 12 пациентлан пуымо. Кызытеш чыла эмым налме огыл, но арня мучашлан тиде пашан писештмыжлан ӱшан уло.

М.ИВАНОВА

Опубликовать в Одноклассники

Добавить комментарий