УВЕР ЙОГЫН

Эмым, путёвкым але оксам?

Марий Элыште федеральный льготник-влакын чумыр чотышт гыч 8 процентше 2020 ийлан натуральный услугым ойырен налын.

Социальный услуго наборым але тудын олмеш оксам ойырен налме нерген йодмашым 1 октябрь марте пуаш лийын. Иктешлымаш рашемден: федеральный льготник-влакын чумыр чотышт гыч 92 процентше набор дечын шӧрлен да олмешыже оксам ойырен налын.

Натуральный услугым ойырен налше пенсионер-влак кокла гыч шукынжо (15%) санаторий-курорт тӧнежыште эмлалташ кумылан улыт. Шагал огыл льготник (12%) эмым ойырен налын. Ола воктенысе кӱртньыгорно транспорт дене яра кудалышташ шонышо (10%) ты гана палынак катыкемын.

Ушештарена, гражданинлан инвалидностьым 1 октябрь деч вара пуымо гын, тудо социальный услуго наборым теният, вес ийынат натуральный вид дене налын кертеш. Набор олмеш оксам налаш кумылжо лектеш гын, йодмашым Пенсий фондыш 2020 ий 1 октябрь марте пуэн кертеш.    

Натуральный социальный услугын кугытшо окса эквивалент дене 1121 теҥгеат 42 ырыш шуэш, тышечын 863 теҥгеат 75 ырже кӱлешан медикаментым ситараш ойыралтеш,  133 теҥгеат 62 ырже – санаторий-курорт тӧнежыште эмлалташ путёвкым налаш, 124 теҥгеат 5 ырже – ола воктенысе кӱртньыгорно, тыгак ола кокласе транспорт дене эмлалтме верыш яра кудалаш да мӧҥгеш пӧртылаш.

М.ИВАНОВА

Опубликовать в Одноклассники

Добавить комментарий