Россий Пенсий фондын увертарымыж почеш, 1 февраль гыч южо социальный выплате 3 процентлан кугемеш.
Тидыже эн ончычак тылзе еда тӱлыман окса выплате дене кылдалтын. Тудым Марий Элыште федеральный льгот дене пайдаланаш праван 75 тӱжем еҥ налеш. Тиде радамыш боевой действийын инвалидше ден ветеранже, радиацийын зиянже дене тазалыкым лунчыртышо граждан, Совет Ушем да Россий Герой, тыгак Социалистический Паша Герой-влак да молат пурат.
Индексацийын кугытшо 2019 ийысе инфляцийым шотыш налын палемдалтеш.
Социальный услуго наборат 3 процентлан индексироватлалтеш. Закон почеш тудо натуральный але окса формо дене ойыралтеш. 1 февраль гыч тичмаш окса эквивалентын акше 1155,06 теҥге марте кӱза. Индексаций деч вара социальный услугын радамже тыгай лиеш:
- эмлан, медицине изделийлан да эмлыме продуктлан – тылзыште 889,66 теҥге;
- санаторийыште да курортышто эмлалташ путёвкылан – тылзыште 137,63 теҥге;
- эмлалтме вер марте яра кудалаш да мӧҥгышкӧ тыгак яра пӧртылаш – тылзыште 127,77 теҥге.
Тылеч посна февраль гыч колышым тойымылан пособий 6124,86 теҥге марте кугемеш. Тудыжым Пенсий фонд илыш гыч кайыше пашам ыштыдыме пенсионерын родо-тукымжылан тӱла.
М.ИВАНОВА
