Йошкар-Олаште ик пӧръеҥ преступленийым ыштен, а вара тидын нерген каласаш полицийыш шкежак миен.
Тыгай ӧрыктарыше случай кодшо кечылаште лийын. Эн ончычак полицийыш Йошкар-Оласе Карл Либкнехт уремыште 88 ияш пенсионеркын сумкажым шолыштмо нерген увер пурен. Туткар лийме верыш мийыше следственно-оперативный группо рашемден: кувавай подъезд воктене теҥгылыште шинчен. Кенета тудын деке палыдыме еҥ куржын толын да тудым шӱкалын. Илалше еҥын камвочмекше, пӧръеҥ сумкажым руалтен куржын. А тушто ӱдырамашын документше ден 1500 теҥге оксаже лийыныт.
Тиде факт шотышто уголовный делам тарватыме.
Уголовный розыск пашаеҥ-влак оперативно-кычалме мероприятийым эртарашат тӱҥалыныт улмаш, но преступленийым ыштыше пӧръеҥ икмыняр жап гыч полицийыш шкеже миен да мом ыштымыж нерген каласен. Тиде ончыч судитлыме 41 ияш пӧръеҥ-бомж лийын. Тудо поген налме сумкам вараже кушко кудалтымыжым ончыктен. Ты жаплан пӧръеҥ тушто лийше окса дене аракам налмыж нергенат каласен.
Тыгеат лиеда…
Л.КАМАЛЕТДИНОВА
