КУЧЕМ УВЕР УВЕР ЙОГЫН

ШИРЯЙКОВО МИКРОРАЙОНЫМ САЙ ВАШТАЛТЫШ ВУЧА

3 сентябрьыште республикыш Российын чоҥымо паша, илыме вер да коммунал озанлык министрже Ирек Файзуллин толын. Аэропортышто тудым Марий Эл Республикым вуйлатыше Александр Евстифеев вашлийын. Нуно Ширяйково микрорайонышто илыме верым чоҥымо да Ленин проспект велым Изи Какшанын пурла серысе кумдыкшым реконструкцийым ыштыме нерген йодышым каҥашеныт.

Марий Эл вуйлатыше Ширяйково микрорайонышто кумдыкым комплексно вияҥдыме проект кышкарыште аварий лӱдыкшан пӧрт-влакым кораҥдыме да тиде верыште шуко пачашан пӧртым чоҥымо нерген ойлен. Кызыт ты кундемыште аварий лӱдыкшан 35 илыме пӧрт уло, нуно чылаже 13,8 тӱжем кв.метрым айлат. Ончыкыжым 150 тӱжем кв.метр кумдыкан у илыме верым чоҥаш палемдыме.

Марий Эл правительстве председательын икымше алмаштышыже Александр Сальников ешарен: «Тиде микрорайон олан рӱдыж деч тораште огыл верланен, но тудо ок вияҥ. Пӧрт-влакым 1950-ше ийлаште чоҥымо. Кызыт икымше ужашыжым саемдена. Тыште пачерым налше лектеш, застройщикат толеш, но эн кугу нелылыкше – йолешке-влаклан кошташышт корно уке. Сандене ме эҥер серым тӱзатыме пашам умбакыже шуйынена, проект да смете ямде улыт, кугыжаныш экспертизым эртеныт».

Россий Минстройым вуйлатыше ден Марий Эл вуйлатыше Патриарший площадьыште лийыныт, тыште чоҥен шуктыдымо икмыняр объектым, нунышт эҥер серын моторлыкшым локтылыт, онченыт.

***

И.Файзуллин ден А.Евстифеев республикым социально-экономически вияҥдыме индивидуальный программым илышыш пуртымо йодыш дене совещанийым эртареныт. Ончен коштмо да совещаний деч вара Российын чоҥымо паша да ЖКХ министрже СМИ пашаеҥ-влаклан регионышто ышталтше паша нерген шке шонымашыжым ойлен.

«Таче мый индивидуальный программе да моло все программе почеш, кудыштым Марий Элыште Россий Минстрой шыҥдара, чоҥалтше икмыняр объектым ончен савырнышым. Палемдыман, чыла объектшат кӱкшӧ качестван. Эше олан арулыкшо шинчалан перныш. Александр Александровичым да тудын командыжым пачерым шукырак чоҥаш ӱжам, йодмаш уло, таче еш ипотеке пашам ышта, ял ипотеке уло, льготан ипотеке умбакыже шуйна. Каласыман, индивидуальный программе «Единый Россий» партийын темлымыж почеш 10 регионышто шыҥдаралтеш. Вашталтыш-влак, мутат уке, пурталтыт: кажне регион программым кугемдаш йодеш, но тӱрыс ончымаште инфраструктур бюджет кредит, облигаций, ФНБ-н средстваже кӱшеш модернизаций программе-влак Россий президентын кӱштымыж почеш таче чыла регионлаштат ончалтеш, нунын коклаште Марий Элыштат», – каласен Ирек Файзуллин.

Журналист-влакын йодышыштлан вашештымыж годым Марий Эл вуйлатыше Александр Евстифеев палемден: Россий Минстройын вуйлатышыжын Марий Элыш толын коштмыжо моткоч кӱлешан, регионысо властьын пашажым верыштак ончыкташ йӧным пуэн.

«Те паледа, корнылан 100 миллион теҥге ешарен пуалтеш. Тиде полышым Ирек Энварович таче кечылан ойыраш полшен. Ме Минстройын, тудын вуйлатышыжлан таум каласена, тачысе совещанийлан веле огыл, а республикын правительствыже дене идалык мучко кылым кучен шогымылан. Ме шуко йодышым каҥашена, да Чоҥымо пашан министрже, тудын алмаштышыже-влакын эреак чулымын пашам ыштымыштлан кӧра федерал кӱкшытыштӧ шуко йодыш шотышто полышым шижына, чыным ойлаш гын, нуно республиклан планым да нацпроект-влакым шуктымаште полшен шогат, тидлан кугу тау. Таче ме ятыр объектлаште лийна, Ирек Энваровичын профессионал семын ончалтышыже шижалте, кушто саемдаш, кушто писемдаш кӱлмӧ шотышто ой-каҥашыжым, мутат уке, ме пашаштына кучылташ тӱҥалына. Вашлиймаш моткоч лектышан, Марий Эл Республикылан поснак пайдале, республик да мыйын лӱм дене Тыланда, Ирек Энварович, да командыланда пеш кугу тау», – палемден Марий Эл вуйлатыше Александр Евстифеев.

 

Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен.

 

Опубликовать в Одноклассники

Добавить комментарий