УВЕР ЙОГЫН

Чылажат калыклан йӧнан лийшаш

5 сентябрьыште, республик вуйлатышын пашажым шукташ тӱҥалмыжлан лач вич тылзе темме кечын, Александр Евстифеев Советский районышто илыше-влак дене тӱвыра пӧртыштӧ вашлие.

Тиде – калык дене тыгай сынан мутланымашым эртарыме пытартыш район ыле. Вашлиймаш тӱҥалтыште тудо погынышо калыклан, а тудыжо тыштат зал тич чумырген ыле, республикыште экономике, социальный илыш кызыт могай улмо нерген каласкалыш.

Тылеч вара лӱмешыже «Вияш линийыш» ты район гыч пурышо йодыш-влак деке кусныш. Ятыр районышто тыгайже тӱҥ шотышто нылыт-визыт наре веле лийын гын, Советский район гыч 18 йодыш пурен!Кажныжым лудо да кажныжланак пырля мийыше министр-влаклан вашешташ темлыш, икмыняржылан район вуйлатышым рашемдаш йодо.

Еҥ-влак йочасадыште стационар телефон ден Интернетым кораҥдыме дене келшыдымышт нерген ойленыт, вӱдын уда качестван улмыжлан, уда корнылан, икмыняр молылан ӧпкелалт ойленыт да полшаш йодыныт. Район вуйлатышын палдарымыж почеш, тыште 80 наре илемыш шуйналтше корно шӱкшӱ. Но Советский – Вечын – Ӧрша корно  ик эн уда. Ты корным, тыгак Кельмаксолаште, Кожласолаште, южо моло ялыште йӧн да окса лийме семын ышташ да тӧрлаш сӧрышт.

— Пашаче группо 2018 ийлан бюджетым ямдыла. Советский районлан мом ышташ кӱлмым палаш мыланна тендан деч эн ончыч мом ышташ кӱлмӧ шотышто йодмаш лийшаш, — корно шотышто мутланымашым шуен, А.Евстифеев район вуйлатышылан темлыш.                                    

Тыгак мланде участке дене келшен толдымын пайдаланыме кугу мутланымашым тарватыш. Тиде йодышым пуышылан А.Евстифеев республикысе кугыжаныш пого министр Наталья Севостьянова деке вигак приемыш мияш темлыш.

Чодырам налме дене кылдалтше йодышлан Чодыра да сонар озанлык министр Алексей Шургинын вашештымыже А.Евстифеевлан ыш келше. Сандене умылтараш тыршымыжым лугыч ыштен, шкеже ойлаш тӱҥале.

         — «Кайыза да мемнан  арендатор-влак деч чодырам налза. Мемнан задачына – нунылан ужалаш полшаш» вашмут – вашмут огыл. Уке – тиде мемнан задачына огыл. Мемнан задачына – еҥ-влаклан чодырам келшен толшо ак дене  ужалымаш. Мый предпринимательствылан але бизнеслан манын ом ойло. Мый еҥ-влаклан пӧртым, моло оралтым чоҥаш ойырымо нерген ойлем, — мане.

Солнечный поселкышто у фельдшер-акушер пунктым, Кукмарийыште у школым, Советский поселкышто автовокзалым кунам почшашым пален налаш тыршышт. Министр-влакын палемдымышт почеш, кок учрежденийжат 2019-2020 ий-влаклан программыш пурталтыныт. А вокзал нерген А.Евстифеев тыге палемдыш:

— Вокзал-влак кугыжаныш кидыште лийшаш улыт. Чот тоштемшым ачалымеш, весым чоҥаш шулдынрак шуэш гын, ме тыгак ыштена. Телым калык уремыште йӱштыштӧ кылмен шогышаш огыл. Сандене кеч жаплан верым ыштыман. Тидын нерген мутланаш район вуйлатыше-влак дене лӱмынак совещанийым эртарыза. А шушаш шошым типовой проектым пеҥгыдемдаш да, тудын дене келшышын, йӧнан, шокшо автовокзал-влакым ышташ кӱлеш, — темлыш А.Евстифеев промышленность да транспорт министрын пашажым шуктышо Д.Волковлан.

Советский районышто улшо предприятий-влак кокла гыч эше икмыняр жап ончыч Вокан, вара Ново-Фокинский ликер да арака завод кугу лектыш дене пашам ыштеныт. А кызыт пашашт тӱпланен, сандене еҥ-влак завод-влакым угыч пашашке колтымо шотышто йодышым каҥашышт. Нуно районын экономикыжым веле огыл нӧлталыт, эше шуко еҥлан паша вер лиеш манын палемдышт. Но А.Евстифеев тӱҥалтыште кеч иктыжым угыч почаш да пашаже кузе каяш тӱҥалмым ончалаш лиеш, мане.

Ик самырык ава кумыт да тылеч шукырак шочшан еш-влаклан тылзе еда оксам тӱлымым пӧртылтат уке манын йодо. Тидлан А.Евстифеев важмалдыкынрак вашештыш:

— Ты шотышто, мыйын шонымаште, чыла сай лиеш.

Пытартыш еҥын ойлымыжо вашлиймаш нерген сай шарнымашым кодаш полшыш. Верысе тӱвыра пӧрт пелен чумырымо «Советчанки» ансамбльын участницыже Александр Евстифеевлан кугу фотокартычкым пӧлеклыш.

— Килемар районышто эртыше «Земля предков» фестивальыш мийыме годым ме Тендан дене пырля войзалтна. «Ик картычкыжым мылам ыштыза», — ойлышда тунам. Ме сӧрымынам шуктенна, — мане да фотографийым кучыктыш.

Любовь Камалетдинова.

Опубликовать в Одноклассники

Добавить комментарий