Таче, 18 ноябрьыште, Российыште Йӱштӧ Кугызан кечыжым палемдат.
Молан лачак ты кечым ойырен налыныт? Айста пален налына.
Великий Устюгым (Вологда область) официально Россий Йӱштӧ Кугызан шочмо вержылан шотлат. Метеоролог- влакын шуко ий эскерымышт почеш, иктаж 18 ноябрьлан ту кундемыште сутка еда кокла температур икшырымын минусыш кусна, лум воеш, икманаш, чын теле толеш шол.
Икымше гана пайремым 2005 ийыште палемденыт. 18 ноябрьыште Великий Устюгыш тӱрлӧ кундем гыч йомакысе уна-влак толыт, концертым, вашлиймашым эртарат, а эше элнан икымше у ий кожыштыжо тулым чӱктат. Тылеч вара Йӱштӧ Кугыза Россий мучко У ий деч ончычсо путешествийыш кая.
Йошкар-Олаш Йӱштӧ Кугызан поездше 16 декабрьыште толеш. Тушко билетым теҥгече «РЖД» ОАО-н сайтыштыже ужалаш тӱҥалыныт.
Михаил Скобелевын фотожо/ «Марий Эл» увер агентстве




