Марий кугыжаныш университетын шанчыеҥже-влак коронавирус пневмоний дене черланымым искусственный интеллект полшымо дене пален налыт. Вузышто цифровой медицине дене кылдалтше тиде проектым илышыш шыҥдараш тӱҥалыныт.
Шанчыеҥ-влакын научный разработкыштлан кӧра пневмоний дене черланымым тӱрыс гаяк пален налаш лиеш. «Тӱня мучко пандемий озаланыме годым медицине тӧнеж-влакын пашаштым куштылемдаш полшаш кӱлеш. МарГУ-н учёныйжо-влакын ты научный разработкышт врач-влаклан полыш. Палена, COVID-19 черын ик эн кумдан шарлыше вариантше – шодым пытарымаш. А жапыштыже ыштыме диагностикылан кӧра черлан нелемашыже чаракым ышташ лиеш», – каласен вузын медицине факультетшын деканже В.Никитин.
Кызыт шанчыеҥ-влак вирусан да бактериологический пневмонийым пален налаш нейрон сетьлам тунемме шотышто шымлымашым эртарат. Ончыкыжым вузын медицине факультетыштыже цифровой область дене кылдалтше научнын шымлыше лабораторийым почаш палемдыме.
Г.КОЖЕВНИКОВА