УВЕР ЙОГЫН

Спорт: Тура курыкат, неле корнат лӱдыкшӧ огытыл

3 июньышто Волжский районысо Руш Шайра ден Курыклӱвал ял-шамыч коклаште (Мӱшыл ер йыр) курыкышто куржталме дене таҥасымаш эртыш. Ветеран-влак коклаште Россий гран-прин черетан этапыштыже, районын открытый первенствыштыже 100 утла участник вийжым терген. 

Тиде гана спорт мероприятий тыгак «Ямде лий!» газетлан 85 ий теммылан пӧлеклалтын. Игечыжат ты кечын леве, куржталше-влаклан келшыше  лийын: кӱшыч чевер кече шыргыжын, мардежат пуалын. Курыкышто куржталме дене вийым тергаш Моско, Омск, Йошкар-Ола, Озаҥ олала да республикнан тӱрлє районжо гыч спортсмен-профессионал, спортсмен-ветеран, куржталаш йєратыше, тунемше-шамыч чумыргеныт.

Стартым тӱшкалан шелын да ийготым ончен пуэныт. Южышт тура курыкым тыглай ошкылынат, нушкынат кӱзеныт, но финишыш кажныже толын шуын. Эн тӱҥжє – шкем тергаш, таза илыш-йӱлан йолташыже лияш.

Таҥасыме коклаште ӱдыр-рвезе-влак тӱрлє модыш дене модыныт, спорт клубыш коштшо каратист-шамыч тренировкым эртареныт…

Тӱшкам шотыш налын, сеҥыше-влаклан кубокым, призёр-шамычлан медальым кучыктеныт. Тыгак кумылан-влак эстафетыште вийыштым  тергеныт. Сеҥышылан, Карай кундемын спортсменже-влаклан, – торт.

Курыкышто куржталме дене эн изи участник ныл ияш Артём Ефремов лийын гын, эн кугу – 77 ияш Анатолий Пегов. Абсолютный чемпион тений адакат – Медведево кундемын тале эргыже, кызыт Озаҥ олаште пашам ыштыше Сергей Семёнов.

– Пытартыш жапыште марафоныш, пелемарафоныш лектам, курыкышто куржталме денат вийым тергаш келша. Ончыкылык шонымаш лийшаш да айдеме келшыше пашам ыштышаш, тарванылшаш, – манеш шкеже.

Россий кӱкшытан гран-прин черетан этапыштыже ӱдырамаш ветеран-влак коклаште Омск гыч Антонида Васильева чемпион лийын.

– Мый тиде таҥасымашке лӱмынак толыным. Такшым мый шкеже Волжский район гыч улам. Трассе пеш неле ыле, курыкшат тура, но тидлан ме тунемын улына. Пӱртӱс, шочмо кундем могай-гынат у шӱлышым, вийым пуат. Шукерте огыл Кисловодскышто лийынам. Єрдыж кундемлаш лектын тӱняончалтышат ваштлатеш, шуко еҥ дене палыме лият. Тыге икте-весе коклаште кыл пеҥгыдемеш. Вет тидыже пытартыш жапыште огеш сите. Икте-весылан ӱшанымым чарнаш тӱҥалынна. Тек таза илыш-йӱлам кучымо ончыкылыклан волгыдо ӱшаным гына пуа, – шыргыжеш А.Васильева.

– Курыкышто куржталме дене икымше гана таҥасенам. Лӱмынак Москва гыч толынам. Шкемым тергаш шоненам ыле, оҥай такшым. Трассе пеш неле ыле. Ик йырым пуымекак йєсє лие, но финишыш толын шуым, – ойла лум курыкышто куржталме дене Российын чемпионжо А.Ганиев. – Вер-шєр, пӱртӱс келшеныт, ержат ойыртемалтше, шкешотан.

Е.Эшкинина.
Авторын фотожо.

Опубликовать в Одноклассники

Добавить комментарий