УВЕР ЙОГЫН

У Торъял районысо тунемше-влак пионер радамышке пуреныт

19 майыште элна мучко Пионерийын кечыже палемдалтеш. Но У Торъял районышто тиде пайрем лӱмеш торжественный линейкым 16 майыштак эртарышт. 

Вӱргечын кечывал лишан поселкысо рӱдӧ площадь пуйто «пеледалте» -шӱйышкышт йошкар галстукым пижыктен, вуйышкышт тыгаяк тӱсан береткым упшалын, южо школышто тунемше  ӱдыр-влак, тыгаяк чевер йошкар сарафаным чиен, тушко чумыргеныт ыле. Чыла тидыже вигак ондаксе пионер жапыш пӧртылтыш…

Мероприятийыш районысо чыла 9 школ гычат 5-10 тунемше дене чумыргеныт ыле. Мутат уке, тиде эн чолга ӱдыр-рвезе-шамыч гына лийыныт.  

Погынышо-влаклан эн ончычак пионер организацийын историйже нерген каласкалышт. Тылеч вара ӱдыр-рвезе-шамычым пайремышт дене У Торъял район муниципал образований вуйлатыше Евгений Небогатиков саламлыш.

Сценарий дене келшышын, умбакыже ӱдыр-рвезе-шамыч асфальтысе  сӱрет конкурсыш ушнышт.

А кечывал деч вара пайрем эҥер воктене шуйнен. Тушто «Лидерын школжо» эртен да эн чолга тунемше-влакым палемденыт, сӱрет конкурсышто сеҥыше-влакымат саламленыт. Тыгак йоча толкынын ветеранже-влак шарнымашышт дене пайлалатыныт. А вара, тулотым олтен, тушан пареҥгым кӱктеныт, тӱрлӧ модыш дене пырля модыныт, тренингыш ушненыт да гитар почеш мурым иквереш йоҥгалтареныт.

Любовь Камалетдинова.

Опубликовать в Одноклассники

Добавить комментарий