Марий Элым вуйлатыше Александр Евстифеев 6-8 июньышто Санкт-Петербургышто тӱнямбал экономике форумышто (ПМЭФ) участвоватла.
Александр Евстифеев 6 июньышто форум тӱҥалме деч ончыч тыгай кугу погынымаште участвоватлыме деч мом вучымыжо да республиклан могай йӧн почылт кертме нерген ойлен. Эн ончычак тиде — экономический пайда. Ме промышленность, ялозанлык, образований, интеллектуальный сферыште республик дене пырля пашам ышташ ямде улшо-шамыч дене деловой кылым ыштынена, инвестор, партнер-влакым кычалына. Таче эрдене ты шотышто икмыняр темлымаш пурен, каласен Марий Элым вуйлатыше.
Заседанийыште экономически кушмо темпым вияҥден колтымо, кумылан улшо инвестор-влакым ушымо нерген мутланат. Тыгак Россий президент В.Путинын майысе указше дене келшышын, регионлаште шуктен толмо национальный проект-влакын элыште да тудын кажне субъектыштыже экономический вияҥмашлан могай влиянийым ыштен кертмыштым каҥашат.
Кугу погынымаш эртыме жапыште ятыр соглашенийым подписатлаш палемдалтеш. Теҥгече Петербургысо тӱнямбал экономике форумын кышкарыштыже Марий Элын правительствыже ден Киров областьын правительствыже коклаште торгово-экономический, научно-технический, культур да моло сферыште пырля пашам ыштыме нерген соглашенийым подписатлыме. Документеш Марий Элым вуйлатыше Александр Евстифеев ден Киров областьын губернаторжо Игорь Васильев кидым пыштеныт.
Россий Федерацийын кок субъектше коклаште пырля пашам ыштыме нерген ойлышыжла, Александр Евстифеев «Юл-Янцзы» формат почеш регион-влакын пырля пашам ыштымышт шотышто советын заседанийыштыже регион-влакын шукерте огыл участвоватлымыштым ушештарен.
Игорь Васильев Марий Эл ден Киров областьын пырля ямдылыме проектышт сайын шукталтеш, тиде корным ыштымаш, газым пуртымаш да молат, манын палемден.
Марий Эл ден Киров областьын келшен пашам ыштымышт нунылан трлӧ сферыште позицийыштым пеҥгыдемдаш да регион-влакын инвестицийым ушен кертме йоныштым саемдаш полша.
Тыгак «Россий Сбербанк» ПАО дене Марий Элыште экономический, инвестиционный да социальный политикым шуктен толмо, «Почта Банк» дене регионын экономический куатшым кугемдыме да финанс услугым саемдыме, «1С» ООО дене информационный технологийым кучылтмо, «1С:Предприятий» программный платформым кучылтмо негызеш кугыжаныш управлений шумлык пайдале системым ыштымаште шинчымашым да опытым шыҥдарыме нерген договор-влакым пеҥгыдемдаш кутырен келшыме.
Тылеч посна Марий Элын правительствыже ден «Российысе экспорт рӱдер» АО коклаште договорым, республикын правительствыже тыгак «У проект-влакым шыҥдарыме шотышто стратегический инициативе шумлык агентстве», «Профессионал сообществе-влакым да пашаче кадрым вияҥдыме «Самырык профессионал-влак (Ворлдскиллс Россий) агентстве» ушем дене «Промышленностьлан кушкашыже кадрым ситарыме регионысо стандарт» проектым шуктымо ужаш шумлык договорым ышташ шона.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
