Волжск оласе Патриотический воспитаний рӱдерын тактический площадкыштыже Совет Ушем Герой Зинон Прохоровын подвигшын йоча-юношестве военно-патриотичекий реконструкцийже лийын.
Тушко оласе тунемше, студент, курсант-влак ушненыт. Инсценировко годым стилизоватлыме военный формо, саркурал ден техникын макетышт, тыгак тӱрлӧ пиротехнике, йӱкан эффект кучылталтыныт. «Лазертаг» технологий дене икымше гана пайдаланеныт. Чыла тиде сар жапым да чынже денак кредалмым ушештарен.
Тыгай сынан реконструкций элын военный историйжым, геройна-влакын подвигыштым келгынрак пален налаш йӧным пуа.
М.ИВАНОВА.
