Эртыше кечылаште Россий президентын Юл кундемысе полномочный представительже Игорь Комаров заседанийым эртарен. Тушто Марий Эл вуйлатыше А.Евстифееват лийын.
Заседанийыште тыгак Россий спорт министрын алмаштышыже М.Томилова, РФ генеральный прокурорын алмаштышыже С.Зайцев, регионласе губернатор, лӱмлӧ спортсмен, физический культур, спорт да туризм сферлаште тыршыше мер организацийлан вуйлатышышт-влак лийыныт. Тушто ПФО-што тӱшка, йоча да самырык-влаклан спортым, физический культурым вияҥдыме да спорт дене кылдалтше моло йодышым каҥашеныт.
– Чылажат калыкын илышыжым, тазалыкшым саемдыме дене кылдалтын, – палемден И.Комаров.
Тудо тыгак элнан вуйлатышыже В.Путинын ойжым ушештарен: спортын вияҥмыже – ик эн кӱлеш задаче. Физический культур да спорт дене шукырак еҥ кылым кучышаш, а тидлан ме йӧным ыштышаш улына.
Тыгодым М.Томилова спортышто кугурак результатыш шумаште «Спорт – илышын нормыжо» федерал проектым илышыш шыҥдарыме полша манын палемден. Тудын ойжо почеш, спортым вияҥдыме да граждан-влакын тазалыкыштым пеҥгыдемдыме шотышто шкешотан системым ыштыме. Арам огыл регионлаште кугу кӱкшытан таҥасымаш-влак эртаралтыт. Мутлан, тений кеҥежым Пенза областьыште всероссийский ялысе кеҥеж модмаш лиеш, а Татарстан Республикыште спорт объект-влак тӱнямбал кӱкшытан таҥасымаш-влаклан омсаштым почыт.
Вашлиймаште инфраструктур, кадр дене кылдалтше йодыш-влакат єрдыжеш кодын огытыл. Верысе калыклан спорт дене кылым кучаш верлаштак сай йӧным ышташ палемденыт.
«Спорт – илышын нормыжо» федерал проект дене келшышын, 2019 ийыште Марий Элысе 6 районышто изирак спорт площадкым чоҥеныт. Тений эше ГТО нормативым сдатлаш кум вере площадкым чоҥышаш улыт. Ӱмаште «Физический культур ден спортын вияҥмыже» федеральный программе почеш калыклан спорт сооруженийым чоҥымаш 60 процентыш шуын. Тыгак республик вуйлатышын указше почеш, кундемыштына «Тазалык да спорт кече» эртаралтеш.
Район ден олалаште физкультурно-тазаҥдыме, спорт пашам шуйышо 910 учреждений, предприятий, ушем, организаций улыт. Республикыште таче кечылан физический культур да спорт дене 44 процент калык пеҥгыде кылым куча.
А.Евстифеев СМИ пашаеҥ-влаклан спортым вияҥдыме шотышто ончылан шындыме задаче нерген палдарен:
– Мемнан задачына: таза илыш-йӱлам илышыш шыҥдараш, спорт объектлам чоҥаш. Мыланна, поснак ял ден селалаште, тренер-влак кӱлыт, вет Марий Элыште спортсмен-влакым ямдылаш, кугу кўкшытан таҥасымашлам эртараш чыла йӧн уло.
Марий Эл Республик вуйлатышын
организаций да аналитике виктемын
уверже негызеш Е.ЭШКИНИНА ямдылен
