КУЛЬТУР ДА ИСКУССТВО

Тӱвыра аланыште: «Чевер май» чоным чеверта

У Торъял районысо «Первый май» колхозын «Чевер май» вокально-инструментальный ансамбльже уло. Республикыштына эше могай озанлык шкенжын посна ансамбльже улмо дене моктанен кертеш? Тӱвыра пӧрт ден клуб-влак пелен чумырымо-шамыч нерген палена, а тыгай нерген тетла колалтын огыл. Санденак таче «Чевер май» ВИА дене тендам, пагалыме лудшына-влак, кумданрак палдарынена. 

Чыным ойлаш гын, тиде ВИА-шке чумыргышо-влак чыланат тунар уста, мастар, чолга да шке пашаштым йӧратыше улыт — кажне участникше нерген посна да кугу-у материалым возаш лиеш. Да такшым гын але марте вич еҥ гыч кумыньышт нерген газетыштына савыктенна. (Лишыл жапыште эше ик участникше нерген каласкалаш шонымаш уло – авт.) Репертуарыштыштат тугай сӧрал муро-влак улыт – мый гын кумылым тыманмеш нӧлталын але, чоным тарватен, шинчавӱдымат луктын  кертше мурымыштым чарныде колыштам ыле, товатат! Сценыштат участник-влак шкеныштым моткочак тыматлын, шыман кучат да кумылымак савырат. Чыла тидым шотыш налынак, «Чевер май» ансамбльын вуйлатышыже Элла Золотова дене шукерте огыл мутым вашталтышна.

— Газетыштына але марте ансамбльын участникше-влак нерген радамлынак каласкален палдаренна. Тыгодым коллективда нерген увер сынан кӱчыкрак материалым веле возенна. Сандене мутланымашна тӱҥалтыште коллективдан кузе шочмыж нерген каласен кодымо шуэш ыле. Кунам да кузе тиде лийын? Тудым чумыраш кӧ темлен? Молан лачшымак тыгай лӱмым пуымо?

— Колхозын шке ансамбльжым чумыраш председательна Аркадий Арсентьевич Новиков темлен. Тыге 2015 ий майыште ансамбльна шочын. Санденак лӱмжымат тыгайым пуымо. Адакшым колхознажат май денак кылдалтын — «Первый май». «Первый майын» «Чевер майже». Сӧралын йоҥга, шонена.

— Ансамбльыш кӧм ушышашым кузе ойырен налында? Тӱҥалтыште мынярын лийында да кызыт мынярын улыда?

— Ансамбльыш кӧм ушышашым нигузеат ойырен налын огынал. Ончыкылык участник-влак шкештак лектыныт. Дима Афанасьев мемнан деке  пашаш толын ыле. Тунам тудо Чӱксола тӱвыра пӧртыштӧ тырша ыле. А кызыт – «Первый май» колхозын аккомпониаторжо. Светлана Николаевна Медведева  почеламутымат, семымат шкежак воза, йӱкшат яндар. Анюта (Анна Ягодарова —авт.) ден когыньнам мураш налыныт. Василий Кузнецов тунам шӱвыр дене шокташ тунемеш ыле. Кызыт гын тыгак тӱмыр да шиялтыш денат шокта. Александр Калинин аккомпониаторлан ыштен. Шукерте огыл тудо ансамбль гыч каен да ынде визытын улына.

 

Кумданрак — «Марий Эл» газетын
2018 ий 27 апрельыште лекше номерыштыже лудын кертыда.

Любовь Камалетдинова мутланен.

Опубликовать в Одноклассники

Добавить комментарий