Кодшо рушарнян кечывалым Йошкар-Оласе Строитель уремыште ик кудывечыште кугу туткар лийын: KIA машинам виктарышыжла, 42 ияш ӱдырамаш кок йолешкым тошкен. Чот эмганымыж дене 7 ияш рвезе верыштыжак колен, а 64 ияш коважым эмлымверыш наҥгаеныт.
Йочан колымо верышкыже еҥ-влак кызытат пеледыш ден модышым намиен пыштат.
Шукерте огыл вес увер пале лие: рвезын аваже, 34 ияш самырык ӱдырамаш, тыгай ойгым чытен кертде, кумшешыжым кастене шуко пачашан пӧртыштӧ илыме пачер окнашт гыч камвозын. Пиалеш, илыше кодын. Кызыт тудо – реанимацийыште.
Марий Элысе МВД-н ГИБДД управленийжын корно движений лӱдыкшыдымылык пропаганде шотышто группыжын палдарымыж почеш, водительын автомобильым виктарыме стажше улыжат 2 тылзе лийын.
Ушештарыме да шижтарыме семын ача-ава-влаклан эше ик гана каласыме шуэш: корнышто да уремыште шканат тӱткӧ лийман, икшыве-влакымат эскерыман. Кужу кеҥеж каныш жапыште йоча-шамыч утларакше мӧҥгыштӧ шкет кодыт, сандене лӱдыкшыдымылык правилым кеч-куштат да кеч-кунамат шотыш налаш кӱлмӧ нерген уэш-пачаш ушештараш йӧршешат уто огыл! Арам огыл ойлат: «Азап – йол йымалнак».
Л.Камалетдинова.
