Общероссийский калык фронтын Марий Элысе чолга еҥже-влак регионысо Тазалыкым аралыме министерстве деч Волжский районысо Пӱнчысола ялыште фельдшер-акушер пунктым чоҥымо пашам контрольыш налаш йодыныт. Медицине тӧнежым чоҥашлан тендерым модын налше подрядчик объектым сдатлыме жапым шуйкала. Тиде йодыш эртыше арнян ФАП-ын тошто оралтыже йӱлымылан кӧрат пӱсемын.
Волжский районышто лишыл жапыште вич у ФАП омсажым почшаш. ОНФ-ын чолга еҥже-влак Моркыял, Пӧртанур, Усола Корамас да Пызырьгуп илемласе объект-влакым чоҥымо писылыклан да кугытлан сай акым пуэныт гын, Пӱнчысола ФАП шотышто йодышым тарватеныт.
Тыште чоҥымо-монтаж пашам 14 январьыштак мучашлышаш улыт ыле, но эше кӧргым веле олмыкташ тӱҥалыныт, коммуникацийымат шупшын огытыл. Тылеч посна «фронтовик-шамыч» олтымо южо радиаторын кӱвар деч ӱлнӧ верланымыжым палемденыт. Подряд организацийын еҥже-влак чыла ситыдымашым кораҥдаш, а чоҥымо пашам кок арняште мучашлаш сӧреныт.
«Жап шотышто, конешне, кокытеланена, молан манаш гын тыште паша эше ик тылзылан сита. Кучем, ты шотыштак Волжск оласе рӱдӧ больнице деч пеҥгыдемдыме паша радамым эскераш да качестве шотышто контрольым вияҥдаш йодына. Подряд организаций чыла пашам сайынак шукта, да Пӱнчысолаште илыше калык медицине услугым йӧнан оралтыште налаш тӱҥалеш манын ӱшанен кодына», – палемден Марий Элысе ОНФ-ын региональный штабшын сопредседательже Александр Кузнецов.
М.ИВАНОВА
